На захадзе Ірана ў выніку землятрусу магнітудай 7,3 загінула больш за 300 чалавек, яшчэ шэсць чалавек загінулі ў Іраку. Колькасць ахвяр працягвае расці. Сотні людзей атрымалі раненні.
Землятрус выклікаў паніку сярод насельніцтва, жыхары выбеглі са сваіх дамоў на вуліцы. Мячэці ў сталіцы Ірака Багдадзе транслявалі малітвы праз гукаўзмацняльнікі.
Разбурэнні адзначаны прынамсі ў васьмі вёсках, паведаміў іранскаму дзяржаўнаму тэлеканалу IRINN кіраўнік іранскага аддзялення Міжнароднага руху Чырвонага Крыжа і Чырвонага Паўмесяца Мартэза Салім.
Землятрус адбыўся за 30 кіламетраў на паўднёвы захад ад Халабджы ў Іракскім Курдыстане, недалёка ад паўночна-ўсходняй мяжы з Іранам. Эпіцэнтр знаходзіўся на глыбіні 33,9 км, штуршкі адчуваліся ў Турцыі, Ізраілі і Кувейце.