Сойм Партыі БНФ на паседжаньні 20 верасьня перафармуляваў сваё папярэдняе рашэнне пра зьняцьцё кандыдатаў у дэпутаты ад БНФ з выбараў. Новым рашэньнем Сойм «дазволіў» кандыдатам зьнімацца. Ранейшая ўхвала абавязвала зьняцьцё. Яна выклікала пратэст шматлікіх кандыдатаў ад партыі з рэгіёнаў, упэўненых у сваіх шанцах на перамогу.
У адпаведнасці з сёньняшнім рашэннем кандыдаты ў дэпутаты маюць права спыніць удзел у выбарах. Такім чынам, тыя, хто жадае працягнуць барацьбу за дэпутацкае крэсла, могуць не выходзіць з выбарчай кампаніі.
За зьмену фармулёўкі прагаласаваў 21 сябар Сойму, супраць — 10, адзін партыец устрымаўся, паведамляе БелаПАН.