Фота Змітра Лукашука, Еўрарадыё
Базавае пагадненне аб партнёрстве паміж Беларуссю і Еўрасаюзам рана ці позна будзе, гэтаму нічога не перашкаджае і ўсе бакі разумеюць, што пагадненне трэба заключыць. Пра гэта перад пачаткам саміта Усходняга партнёрства ў Брусэлі заявіў кіраўнік МЗС Беларусі Уладзімір Макей, паведамляе Tut.by.
— Я перакананы, што новае пагадненне паміж Беларуссю і Еўрасаюзам будзе і будзе рана ці позна. Мы з нашымі еўрапейскімі партнёрамі працуем над гэтым, — сказаў Макей. — Гэтаму нічога не перашкаджае, трэба рухацца паступова. Трэба рабіць тыя крокі, якія кожны з бакоў павінен зрабіць. Разуменне, што гэта пагадненне трэба заключыць, мне здаецца, ёсць.
Пытанні ядзернай бяспекі ў аспекце будаўніцтва беларускай АЭС, пра які ўвесь час нагадвае ЕС як пра адно з прыярытэтных пытанняў для пашырэння супрацоўніцтва з Беларуссю, краіны Еўропы ўспрымаюць па-рознаму, але беларускі бок гатовы абмяркоўваць іх адкрыта.
— ЕС глядзіць на гэтае пытанне па-рознаму, але мы супрацоўнічаем сёння з ЕС і мы адкрытыя да супрацоўніцтва. Больш за тое: мы маглі не праводзіць стрэс-тэсты, нягледзячы на патрабаванне Еўракамісіі, але правялі, таму што самі вырашылі гэта зрабіць, — заявіў Уладзімір Макей.
Кіраўнік МЗС таксама расказаў, што ў час саміта беларуская дэлегацыя плануе ў тым ліку абмеркаваць мемарандум аб прыярытэтах партнёрства.
***
Усходняе партнёрства — праект Еўрапейскага саюза, які мае асноўны заяўленай мэтай развіццё інтэграцыйных сувязяў Еўрасаюза з шасцю краінамі былога СССР: Украінай, Малдовай, Азербайджанам, Арменіяй, Грузіяй і Беларуссю. У гэтым годзе саміт праходзіць у Бруселі.
У гэтым годзе ўпершыню запрашэнне ў Брусэль на саміт Усходняга партнёрства, якое накіравана ў Беларусь, было адрасавана непасрэдна Аляксандру Лукашэнку. Але прадстаўляць нашу краіну ў бельгійскую сталіцу паехаў кіраўнік МЗС Уладзімір Макей.