04.12.2017 / 23:14

«Rzeczpospolita» ўзнагародзіла Прэміяй Гедройця мастака-беларуса Лёніка Тарасевіча 6

Журы Прэміі імя Ежы Гедройця прысудзіла сёлета дзве раўназначныя прэміі. Першы лаўрэат — Лявон (Лёнік) Тарасевіч, мастак, прафесар выяўленчага мастацтва, які на працягу многіх гадоў удзельнічаў у будаўніцтве прыязных адносін паміж Польшчай і Беларуссю, паведамляе «Rzeczpospolitа».

Лёнік Тарасевіч. Фота: facebook.com

Лёнік Тарасевіч быў узнагароджаны «За нястомную працу на агульнае дабро, за культываванне памяці пра гісторыю Вялікага княства Літоўскага, вялікі ўклад у прасоўванне Польшчы ў свеце як дзяржавы многіх народаў, культур і рэлігій».

Другі з лаўрэатаў — Анджэй Суліма Каміньскі — гісторык, прафесар Каталіцкага універсітэта Джорджтаўн у Вашынгтоне, які прапагандуе веды пра грамадзянскую супольнасць многіх народаў, што ўваходзілі ў склад Першай Рэчыпаспалітай да яе падзелаў трыма суседнімі імперыямі.

Ён атрымаў узнагароду «За імпульс і эфектыўнасць праекту «Аднаўленне забытай гісторыі», рэалізаванага ў духу Гедройця. Адмысловым дыпломам былі адзначаныя намаганні Чарльза Э. Мерыла-малодшага — амерыканскага пісьменніка, выкладчыка, але перш за ўсё філантропа, які падтрымліваў культурныя і адукацыйныя ініцыятывы ў Цэнтральнай і Усходняй Еўропе, у асноўным у Польшчы, на працягу многіх гадоў.

Мерыл быў ўганараваны гэтай узнагародаю імя Ежы Гедройця «за агульную дзейнасць на карысць краін Цэнтральнай і Усходняй Еўропы, — сказаў Багуслаў Хработа, галоўны рэдактар газеты« Rzeczpospolita» і старшыня Камітэту па прысуджэнні прэміі.

Фота: Jerzy Dudek, www.rp.pl

Ежы Гедройць — народжаны ў Мінску польскі публіцыст, палітык, заснавальнік і рэдактар парыжскага грамадска-палітычнага часопіса «Kultura». Яшчэ ў часы СССР прытрымліваўся думкі, што для стабільнасці нашага кантынента патрэбнае існаванне незалежных Беларусі, Украіны і краін Балтыі. Прэмія ягонага імя ўручаецца з 2001 года.

Памятны знак прэміі імя Ежы Гедройця

1
Літаратар / Адказаць
04.12.2017 / 23:20
Ежы Гедройц - сапраўды фігура, роўнай якой у гуманістычным сэнсе цяжка знайсьці на ўсіх абшарах Цэнтральнай і Усходняй Эўропы.
1
жыхары вкл / Адказаць
04.12.2017 / 23:38
Важная і значная прэмія. Працяг справы Гедройца ў нашыя дні. Віншуем пеаможцаў! Яны яе вартыя.
4
Васіль Каляда / Адказаць
04.12.2017 / 23:57
Мы беларусы, нашы продкі літвіны, мы павінны прасоўваць Беларусь ва ўсім Свеце, Беларусь як асноўную спадкаемцу ВКЛ, бо нашыя продкі заснавалі ВКЛ і гэта наша краіна, а не нейкіх там гергуноў, жамойтаў ці летувісаў!
Паказаць усе каментары/ 6 /
Каб пакінуць каментар, калі ласка, актывуйце JavaScript у наладах свайго браўзеру