06.12.2017 / 10:59

Што пісала «Наша Ніва» 110 і 10 гадоў таму

У нашым мястэчку за апошні час пачало вельмі шырыцца п'янства. Праўды, што і даўней нашы мужыкі ад гарэлкі не адракаліся, але ж цяпер дык так п'юць, як ніколі не бывала. Бо ж і выгода для п'янюг настала: настроілі тутака новы тракцір і тры піўныя лаўкі… Ёсць дзе разгуляцца: мужык астатнюю капейку цягне з хаты, кідаючы дзяцей ды жонку галоднымі, і прапівае, а п'яны лезе з кожным біцца да варочаецца дамой з разбітай галавой, акрываўлены…

Цёмны беларусе! Дурманяць цябе праклятай гарэлкай ды апошнюю кроў высысаюць з цябе! Але і сам ты вінаваты: няхай бы так скора з’явілася ў нас бібліятэка, чытальня ці школа, як той тракцір, — дык гэтага няма! У Фінляндыі народ разумнейшы: сейм (дума) забараніў прадаваць гарэлку, хіба толькі для хворага дастанеш у аптэцы.

(Допіс з Лебедзева Вілейскага павета Віленскай губерніі). НН. №34. 1907

Дэлегацыя дэмакратычных сілаў Беларусі, у склад якой уваходзяць Эніра Браніцкая, Сяргей Калякін, Анатоль Лябедзька, Анатоль Ляўковіч, Аляксандр Мілінкевіч, Павал Севярынец і Зміцер Хведарук, у гэтыя дні наведвае ЗША. Найбольш адметнай падзеяй візіту стала гутарка з дзяржсакратаром Кандалізай Райс.

Падчас сустрэчы дзяржсакратар ЗША заявіла, што Вашынгтон падтрымлівае дэмакратычны рух у Беларусі.

А.Лябедзька падараваў дзяржсакратарцы бел-чырвона-белы напульснік з надпісам «За свабоду!». Яна яго адразу ж надзела на руку.

НН. 5 снежня. 2007

Каб пакінуць каментар, калі ласка, актывуйце JavaScript у наладах свайго браўзеру