06.12.2017 / 17:28

Камандуючы Унутранымі войскамі Караеў: Пасля СССР, калі служыць засталіся адны беларусы, я думаў, што дзедаўшчына знікне… 29

Намеснік міністра ўнутраных справаў, камандуючы ўнутранымі войскамі Юрый Караеў падзяліўся сваім досведамі перамогі над дзедаўшчынай. Гэта адбылося падчас сустрэчы з выпускнікамі факультэта Унутраных войскаў Вайсковай акадэміі ў ходзе вучэбна-метадычнага збору.

Як піша часопіс «Спецназ», Караеў адзначыў выпадак у Печах са смерцю шарагоўца Аляксандра Коржыча, які паказаў, што «галоўная небяспека ў сферы парушэння статутных правілаў узаемаадносін у сучаснай арміі — гандлёва-грашовыя адносіны паміж вайскоўцамі, а прасцей кажучы, звычайнае вымагальніцтва: грашовыя пераводы на банкаўскую картку, «купля» дабротаў па службе, карыстанне мабільнікам па вар’яцкім тарыфе».

Караеў адзначыў, што ў СССР існавала «махровая дзедаўшчына», якая была заснаваная на нацыянальнай варажнечы. «Пасля распаду СССР я думаў, калі служыць будуць адны беларусы, то праблема з «дзедаўшчынай» знікне сама сабой. Але прыйшло засілле сяржантаў. А праз некалькі гадоў вярнулася і розніца ў прызывах. Проста ўсе дзейнічалі паводле прынцыпу: з мяне здзекаваліся — і я буду».

Караеў расказаў, што, будучы камандзірам вайсковай часткі, за два тыдні ўскрыў усю сістэму дзедаўшчыны ў ёй. За бясчынствамі стаяў намеснік камандзіра аднаго з узводаў, старшы сяржант. Па словах намесніка міністра, за парушэннем статутных адносін найперш ідзе адсутнасць камандзіра ўзвода, абыякавасць камандзіра роты, страх адказнасці з боку камандзіра часткі.

«Калі парушэнне адбылося, то задача камандзіра ўзвода — паведаміць аб гэтым і пазбавіць сябе граху прыхоўвання», — сказаў Караеў.

Па ягоным меркаванні, любое злачынства, якое адбываецца ў падраздзяленні, — гэта «ўдар па войску, сілавых ведамствах, дзяржаве і прэзідэнце».

Таксама Юрый Караеў назваў асноўнае зло, з якім сутыкаецца малады афіцэр: «1. Алкаголь: колькі, дзе і з кім. 2. Грошы: пазыкі, заклады, гульні. 3. Начное баўленне часу: рэстараны, клубы, дыскатэкі».

***

На тэлеграм-канал «Нашай Нівы» можна падпісацца тут.

Зміцер Панкавец

4
Туш / Адказаць
06.12.2017 / 17:36
Здаецца, нармальны мужык. Нешта ўцямнае кажа, агучвае праблему і дае рэцэпт як яе вырашыць. Такая мудрагелістасць рэдкая з'ява для вайскоўцаў. 
13
3-2-1-0 / Адказаць
06.12.2017 / 17:49
Дзедаўшчына - гэта падмурак савецкага войска, бяз якога гэта войска не магло iснаваць. Так як сучаснае белвойска - гэта амаль тое ж савецкае войска, то пазбавiцца дзедаўшчыны ў iм практычна немагчыма. Што б разумнага нi казалi гэныя генералы. На вялiкi жаль, хлопцы будуць гiнуць i далей.
19
Бенедзікт / Адказаць
06.12.2017 / 17:49
"Камандуючы Унутранымі войскамі Караеў: Пасля СССР, калі служыць засталіся адны беларусы, я думаў, што дзедаўшчына знікне..." --------------------------------- Як можа зьнікнуць дзедаўшчына ў войску, у якім камандуюць не нацыянальныя беларускія кадры, а прыхадні з саўковым, альбо імпэрскім расейскім менталітэтам?



Паказаць усе каментары/ 29 /
Каб пакінуць каментар, калі ласка, актывуйце JavaScript у наладах свайго браўзеру