У Гродне кіроўца з сяміразовым перавышэннем нормы алкаголю ў арганізме стаў віноўнікам сур'ёзнай аварыі, паведамляе БЕЛТА са спасылкай на ўпраўленне ДАІ УУС Гродзенскага аблвыканкама. Аварыя адбылася ўвечары 5 снежня ў цёмны час сутак.
«Віноўнік аварыі, як аказалася, раніцай вярнуўся з рэйса, выпіў з сябрам літр віскі і, паспаўшы некалькі гадзін, вырашыў ехаць да сябе дадому. Узровень алкаголю ў арганізме кіроўцы перавысіў дапушчальны больш чым у 7 разоў», — паведамілі ў ДАІ рэгіёну.
Легкавік, які ехаў з выключанымі фарамі, на поўнай хуткасці ўрэзаўся ў аўтамабіль, што стаяў на скрыжаванні. Удараны «Сеат» пераляцеў праз дзве сустрэчныя паласы і вылецеў на ходнік. Пешаходаў і іншых транспартных сродкаў на яго шляху, на шчасце, не аказалася.
Машыны пашкоджаныя сур'ёзна і, магчыма, не падлягаюць аднаўленню. Віноўніка аварыі чакае штраф і пазбаўленне правоў. Да аварыі мужчына працаваў кіроўцам аўтобуса.
