18.12.2017 / 10:30

У фінскай журналісткі правялі ператрус па справе аб разгалошванні дзяржтаямніцы. Яна разбіла вінчэстар камп'ютара сякерай

Yle.fi

Паліцыя правяла ператрус у доме журналісткі Helsingin Sanomat Лауры Халмінэн. Халмінэн з'яўляецца адным з аўтараў артыкула аб вайсковай разведцы, які быў напісаны на аснове сакрэтных матэрыялаў Абарончых сілаў.

Паводле паліцыі, ператрус быў праведзены з-за падазрэння ў асвятленні сакрэтнай інфармацыі, якое можа пагражаць бяспецы. Па словах Халмінэн, паліцыя правяла ператрус без пастановы суда.

Паліцыянты, у прыватнасці, канфіскавалі мабільныя тэлефоны, камп'ютар і карты памяці.

Цікава, што перад падзеямі, журналістка разбіла сякерай вінчэстар працоўнага камп'ютара, каб знішчыць інфармацыю. Аднак той задыміўся і Халмінэн выклікала пажарных.

Разам з пажарнымі прыбылі і паліцыянты, якія выклікалі дадатковую брыгаду, калі зразумелі, кім з'яўляецца Халмінэн.

На камп'ютары Халмінэн былі захаваныя матэрыялы некалькіх журналісцкіх праектаў. Па словах журналіста, знішчыўшы хард-дыск, яна хацела забяспечыць поўную абарону крыніцаў. Але на дыску не было матэрыялаў, звязаных з артыкулам аб разведцы.

Каб пакінуць каментар, калі ласка, актывуйце JavaScript у наладах свайго браўзеру