Незалежныя беларускія брэнды адзення даўно ўжо сталі звыклымі на вуліцах. Беларусы даўно ведаюць і носяць і патрыятычныя світшоты ад LSTR, і пяшчотныя худзі ад RUSLO, і арыгінальны крой моладзевай маркі SAVVA.
Але ж гэта мы. А як ацэняць беларускую вопратку замежнікі?
Каб высветліць гэта, «Наша Ніва» запрасіла некалькіх маладых людзей у краму «Made in Belarus», якая знаходзіцца на 3-м паверсе гандлёвага цэнтра «Маскоўска-Венскі» (праспект Незалежнасці, 56).
З нядаўняга часу крама стала мультыбрэндавай, цяпер там можна знайсці рэчы шэрагу беларускіх брэндаў і маладых дызайнераў. Там можна набыць і вопратку ад мінчукоў LSTR, RUSLO, SAVVA, і прадукцыю брэсцкага брэнда «Важный гусь», і світшоты ад Віталя Гуркова. Акрамя таго, шмат галантарэі і добрых навагодніх падарункаў: мапы БНР у тубусах, гаманцы і рамяні ад брэнда Minsker, плакаты «Гісторыя Беларусі». Якраз тое, што трэба для нашага эксперыменту!
Фабіа (29 гадоў, Уругвай)
«Я вучу расейскую мову ў Мінску. Чаму тут? У Расію не хацелася, я не люблю вялікія гарады. А Беларусь мне падабаецца, люблю Мінск. Тут гарады не такія вялікія, больш спакойныя, гэтым Беларусь трохі падобная да Уругвая. Людзі ветлівыя, зычлівыя, праўда, ёсць адзін мінус — мала хто ведае англійскую, — расказвае Фабіа. — Я адзяваюся проста: худзі, світшоты, джынсы. Худзі нашу пастаянна. З брэндаў вельмі люблю «Андэр Армор», але галоўнае не брэнд, а якасць. Якасную рэч знайсці няпроста. Тым больш у Мінску — я тут яшчэ не ведаю, дзе якія крамы.
Я працую айцішнікам, таму магу сабе дазволіць заплаціць за якасную рэч. Для мяне $100 за добры світшот — гэта нармальная цана».
У краме Фабіа вельмі спадабалася зялёнае худзі з выявай Янкі Купалы і аптымістычнай цытатай «Загляне сонца і ў наша ваконца» ад берасцейскіх вытворцаў «Важный гусь».
«Не ведаю, хто гэта, але мне вельмі падабаецца прынт. І добрая якасць — рэч цёплая, для зімы самае тое», — пракаментаваў выбар Фабіа.
Ацаніў ён і зімовыя курткі ад LSTR.
«Добрыя, але, напэўна, для маладзейшых хлопцаў і дзяўчат. Не маё».
Але даведаўшыся, што на куртцы выкарыстаны не проста нейкі там узор, а план і рэльеф Мінскага ўзвышша, Фабіа трохі змяніў меркаванне:
«О, а гэта вельмі крута!»
Таксама аматар футбола, Фабіа ўпадабаў канцэпт футбольнай формы ад LSTR.
«Увогуле, мне спадабалася якасць рэчаў. І вельмі падабаюцца амаль усе прынты, бо мне, як замежніку, цікавыя рэчы, якія адлюстроўваюць менавіта Беларусь», — падсумаваў Фабіа.
Дыяна (26 гадоў, Эквадор)
«Я вучуся на выкладчыка англійскай мовы ў Гродне. Жыву ў Беларусі 6 гадоў, ужо тут як дома, — кажа дзяўчына. — Але з беларускіх брэндаў ведала толькі вялікія, кшталту «Контэ», «Мілавіцы».
Рэчы незалежных брэндаў дзяўчыне прыйшліся даспадобы.
Адразу ж увагу дзяўчыны прыцягнуў усё той жа яркі зялёны світшот ад «Важный гусь» — з Янкам Купалам.
«Круты малюнак! Мне падабаецца! Канечне, я ведаю, што гэта беларускі паэт, я вучуся ва ўніверсітэце імя Янкі Купалы. Праўда, твораў не чытала… Але ведаю яго біяграфію!» — кажа Дзіяна.
Таксама яна ацаніла жаночы світшот «Шчыгол Cream» ад LSTR і «Аховы птушак Бацькаўшчыны». 10% ад атрыманых за яго грошай пералічваюцца ахоўнікам птушак, гэта таксама паўплывала на выбар дзяўчыны.
«Такія рэчы, з сацыяльнай місіяй, адразу хочацца купіць, гэта карысныя праекты», — патлумачыла яна.
Дзіяна ўпадабала і худзі ад RUSLO.
«Вельмі добра зроблена. І прыемны колер, я люблю такі».
Але фаварытам дзяўчыны стаў брэнд SAVVA.
«Дарэчы, гэтую марку я ведаю. Класная сукенка, мне падабаецца і колер, і фасон. Сур’ёзна, я пасля па яе вярнуся і набуду», — паабяцала Дзіяна.
«Увогуле, у Беларусі шмат незалежных брэндаў, і гэта вельмі крута! У Эквадоры такога няма! А тут шмат рознага, мне гэта вельмі падабаецца, бо гэта ваш стыль, ваша культура, гэта вельмі цікава, — патлумачыла Дзіяна. — Мне тут пасуюць і якасць, і цэны, 30—40 даляраў за якасную рэч — гэта зусім не шмат.
Да таго ж бачна, што невялікія брэнды робяць у першую чаргу цікавае адзенне. Звычайны чалавек купіць тое, што таннейшае, абы было. А тут я бачу адзенне для тых, хто замарочваецца па тым, што насіць. Гэта адзенне для нацыяналістаў і хіпстараў. Гэта ж крута!»
Дэніз (23 гады, Турцыя)
«Я вывучаў міжнародныя зносіны ў Турцыі, цяпер прыехаў у Мінск падвучыць расейскую мову. Увогуле, я планую быць дыпламатам, — распавёў пра сябе Дэніз. — Што тычыцца адзення, то брэнды мяне не вельмі цікавяць, галоўнае, каб мне падабалася. Я нашу і худзі, і цішоткі, вельмі люблю кашулі. За добрую кашулю можна і $50 аддаць, але, напэўна, не больш».
Больш за ўсё Дэніз упадабаў світшот «Нордзік» ад LSTR.
«Рэч прыгожая, цёплая. І я вельмі люблю ваш арнамент, ён вельмі прыгожы! У мяне пакуль няма рэчаў з арнаментам, але я абавязкова набуду сабе хаця б кубачак з ім», — патлумачыў Дэніз.
Таксама яму спадабалася папулярная худзі ад LSTR з буслом і цытатай Янкі Купалы «Не загаснуць зоркі ў небе».
«Гэта ж таксама нейкі беларускі сімвал, так?»
Прымерыў Дэніз і шапачку ад LSTR.
«Класная, цёплая. Але пампон… Гэта дакладна ўнісэкс? Бо ў нас, у Турцыі, падумалі б, што гэта жаночая шапка», — пасмяяўся хлопец.
Ацаніў ён і куртку ад брэнда RUSLO.
«Сімпатычная, але, на жаль, трохі не мой стыль».
«Увогуле, рэчы якасныя, цікавыя. І, мне здаецца, яны вельмі добра адлюстроўваюць Беларусь, добра прэзентуюць яе», — сказаў Дэніз.
Амір (18 гадоў, Іран)
«Я збіраюся вывучаць медыцыну ў Беларусі. Але яшчэ не вырашыў, кім хачу быць: ці то тэрапеўтам, ці то дантыстам, — кажа Амір. — Адзенне ў мяне разнастайнае: і худзі, і скураныя курткі, кашулі, часам нашу пінжак. Па брэндах не замарочваюся, набываю тое, што падабаецца. Максімальны кошт для рэчы кшталту худзі для мяне — $50».
Больш за ўсё Амір упадабаў два худзі. Адно — спакойнае і простае ад брэнда SAVVA.
Другое — зіпер «Ваярскі талер» ад LSTR.
«Вось тут мне падабаецца прынт. Не ведаю, праўда, што гэта. Але прыкольна. Гэта Анёл Смерці? — пажартаваў хлопец. — Але рэчы неблагія. Мне падабаецца якасць, яны вельмі цёплыя. І цікавыя прынты».
