20.12.2017 / 12:16

Мова наша. Фарэль і стронга. І пструг! 24

«Панове-спадарове, вы апублікавалі рэцэпт запякання фарэлі. А хіба гэта правільнае слова? Хіба па-беларуску будзе не «стронга»? — запытаўся ў нас чытач Васіль.

Словы фарэль і стронга — абсалютныя сінонімы, як гіпапатам і бегемот, чай і гарбата.

Слова «фарэль» прыйшло ў беларускую мову з германскіх моў. Па-нямецку гэта «forelle», па-шведску «forell».

Слова «стронга» прыйшло з польскай. У старых славянскіх мовах гэтая рыба называлася «пструг», «пстронг». Імаверна, так і ў Беларусі калісьці яе называлі. Гэтае слова захавалася ў літаратурнай украінскай мове («пструг»), у чэшскай і славацкай - (pstruh), лужыцкай (pstruha), сербскай і харвацкай (па̀струга), славенскай (pǝstroga). Па-польску ж «пструг» - pstrąg, «пстронг» (аналагічна як мудры - «мондры», дуб - «донб» і г.д.). Вось гэтае «пстронг» і перайшло ў новабеларускую мову як «стронга», бо беларусы адаптавалі яго да сваёй фанетычнай сістэмы. Падыход «не ўжываць слова, бо яно гучыць, як і па-расейску», на нашу думку, няправільны, ён збядняе мову. Хай у мове будуць сінонімы: стронга і фарэль. Дый старое слова «пструг» мае права на вяртанне.

Рэд.

11
Клёк / Адказаць
20.12.2017 / 13:11
А беларуская гэта германская мова ці славянская? Прыярытэт мусі быць за стронгай.
3
3-2-1-0 / Адказаць
20.12.2017 / 13:14
Шаноўная Рэдакцыя, я лiчу, што вы блытаеце людзей. Чай ды гарбата - зусiм не "абсалютныя сінонімы" ды абазначаюць розныя рэчы (пашукайце значэньнi хоць бы ў iнтэрнэце). Што да фарэлi ды стронгi - гэта сапраўды абазначэньне аднаго i таго ж, але ў розных мовах. Гэта як бы я вас, хлопцы, назваў "рабятамi". Сьмела называйце стронгу фарэльлю, рабяты. Рэд. Наконт чаю і гарбаты вы памыляецеся. Адкрыйце слоўнікі на Skarnik.by або запытайцеся ва ўласнай прабабулі.
0
Ўладзя / Адказаць
20.12.2017 / 13:17
А вось у маёй маці на вёсцы, ў Рэчыцкім раёне Гомельскай вобласці, дзе старэйшае пакаленне гаворыць амаль на літаратурнай мове, гэтую рыбіну заўсёды звалі ПСТРУГ. Рэд. Дзякуй, цікава!!!
Паказаць усе каментары/ 24 /
Каб пакінуць каментар, калі ласка, актывуйце JavaScript у наладах свайго браўзеру