Ужо не першы год у Беларусі праходзіць акцыя «Нашы дзеці». Гэта дабрачыннае мерапрыемства, якое праходзіць напярэдадні Новага года. Чыноўнікі ўручаюць дзецям падарункі (грошы на гэтыя патрэбы выдзяляюцца асобнымі пастановамі) і сядзяць з імі за салодкімі сталамі.
Фішкай акцыі з’яўляецца тое, што ўдзел у акцыі «Нашы дзеці» прымаюць усе высокія чыноўнікі, улічваючы Аляксандра Лукашэнку.
Гэта рэдкая магчымасць убачыць чыноўнікаў у нефармальнай абстаноўцы. Часта візіты наменклатуры спараджаюць дастаткова цікавыя фотаздымкі. Канечне, усе гэтыя паездкі суправаджаюцца актыўным асвятленнем у дзяржаўных СМІ.
Сёлета акцыю «Нашы дзеці» адкрыў прэм’ер-міністр Андрэй Кабякоў, які паехаў у Маладзечанскую школу-інтэрнат. Ён прывёз для дзяцей інтэрактыўную мультымедыйную дошку, спартыўны інвентар і слодычы.
Ёсць фатаздымак, дзе за салодкім сталом сядзяць Андрэй Кабякоў, намеснік старшыні Мінскага аблвыканкама Ігар Макар, старшыня Маладзечанскага райвынкама Аляксандр Яхнавец і ўсяго адзін школьнік.
У той самы дзень міністр па надзвычайных сітуацыях Уладзімір Вашчанка наведаў Чэхаўшчынскую школу-інтэрнат у Валожынскім раёне. Гэта школа, падшэфная МНС. Курсанты Універсітэта грамадзянскай абароны зладзілі дыскатэку.
Памежнікі звазілі выхаванцаў Дзяржынскага раённага сацыяльна-педагагічнага цэнтра ў цырк. Разам з імі ў цырк трапілі і дзеці памежнікаў з усіх рэгіёнаў краіны. На жаль, здымкаў кіраўніка камітэта Анатоля Лапо з раставымі цацкамі ці звярамі не было.
Міністр унутраных справаў Ігар Шуневіч быў у Радашковіцкай школе-інтэрнаце Маладзечанскага раёна. Галоўнаму міліцыянеру паказалі тэатральную пастаноўку «Элі і яе сябры ў Заснежанай краіне».
Віцэ-спікер Савета Рэспублікі Марыяна Шчоткіна і былая міністр інфармацыі Лілія Ананіч прыязджалі ў Ждановіцкую спецыяльную агульнаадукацыйную школу-інтэрнат. Паведамляецца, што падарункі атрымалі не толькі дзеці, але і сама Шчоткіна ад дзяцей.
Міністр спорту і турызму Аляксандр Шамко ўручыў чэк на 3000 рублёў Івянецкаму дому-інтэрнату для інвалідаў.
Кіраўнік міністэрства абароны Андрэй Раўкоў наведаў Андрэеўскі дзіцячы дом у Аршанскім раёне. Сілавікі прывезлі ў дзіцячы дом новыя ложкі. Таксама міністр сказаў, што прапрацоўваецца варыянт наведвання выхаванцамі «Лініі Сталіна».
Старшыня Следчага камітэта Іван Наскевіч прывёз падарункі для пацыентаў 3-й гарадской дзіцячай клінічнай бальніцы.
