У Беларусі павысілі тарыфныя аклады навукоўцам. Гэта прадугледжана прэзідэнцкім указам № 467 «Аб аплаце працы работнікаў бюджэтных навуковых арганізацый».

Указ распрацаваны ў мэтах удасканалення аплаты працы работнікаў бюджэтных навуковых арганізацый з улікам спецыфікі іх дзейнасці і накіраваны на стварэнне ўмоў для эфектыўнага кіравання рэсурсамі ў мэтах стымулявання працы навукоўцаў зыходзячы з важнасці іх даследаванняў, а таксама павышэння статусу вучонага і прэстыжнасці навуковай дзейнасці, паведамляе прэс-служба прэзідэнта.

Акрамя таго, указам размежаваны паўнамоцтвы дзяржаўных органаў, НАН Беларусі ва ўсталяванні галіновых стымулюючых выплат, пашыраны правы кіраўнікоў бюджэтных навуковых арганізацый у рэгуляванні ўзроўню аплаты працы работнікаў у залежнасці ад развязальных імі задач, зняты абмежаванні ў памеры 40% фонду заработнай платы і эканоміі сродкаў, прадугледжаных на аплату працы, пры накіраванні іх на прэміраванне і ўсталяванне стымулюючых выплат работнікам за кошт бюджэтных і пазабюджэтных сродкаў, удакладнілі ў прэс-службе беларускага лідара.

Згодна з дакументам, тарыфныя аклады работнікаў бюджэтных навуковых арганізацый павышаюцца да 300%.

Рашэнне аб павышэнні акладу да 200% прымаюць кіраўнікі бюджэтных навуковых арганізацый, звыш 200% — органы дзяржкіравання, якім падпарадкоўваюцца дадзеныя арганізацыі, Адміністрацыя прэзідэнта ў дачыненні да арганізацый, падпарадкаваных прэзідэнту, Нацыянальная акадэмія навук Беларусі, паведамляе нацыянальны прававы інтэрнэт-партал.

Хочаш падзяліцца важнай інфармацыяй ананімна і канфідэнцыйна?