У Беларусі пачалася распрацоўка механізму функцыянавання дэпазітна-закладной сістэмы звароту тары. Пра гэта БелТА паведаміў начальнік аддзелу вадаправодна-каналізацыйнай гаспадаркі і добраўпарадкавання ўпраўлення камунальнай гаспадаркі Мінжылкамгаса Арцём Шкрыль.
Дэпазітна-закладную сістэму звароту тары плануецца ўкараніць да 2020 года. Новы механізм закранае інтарэсы шырокага кола суб'ектаў: вытворцаў напояў, аб'ектаў гандлю і грамадскага харчавання. Для выпрацоўкі аптымальнага варыянту яе функцыянавання створана міжведамасная рабочая група, у складзе якой прадстаўнікі органаў дзяржкіравання, бізнэсу, ГУ «Аператар другасных матэрыяльных рэсурсаў».
«У цяперашні час пачалася распрацоўка базы дадзеных аб наменклатуры, матэрыяльных і фінансавых плынях спажывецкай упакоўкі, неабходных нарматыўных прававых актаў і ў цэлым механізму ўзаемадзеяння суб'ектаў. Пасля завяршэння гэтых этапаў магчымая праца з патэнцыяльнымі інвестарамі. У першым квартале 2018 года праекты дакументаў будуць унесены на разгляд членам рабочай групы», - распавёў Арцём Шкрыль.
Укараненне дэпазітна-закладной сістэмы звароту тары прадугледжвае Нацыянальная стратэгія па абыходжанні з цвёрдымі камунальнымі адкідамі і другаснымі матэрыяльнымі рэсурсамі на перыяд да 2035 года, каардынатарам якой з'яўляецца Мінжылкамгас. Новаўвядзенне заснавана на эканамічным стымуляванні спажыўца вярнуць выкарыстаную ўпакоўку. Купляючы тавар ва ўпакоўцы, спажывец выплачвае за яе залог, а пры вяртанні пустой упакоўкі ў тараматы сума гэтага закладу яму вяртаецца. Мяркуецца, што за кошт гэтага механізму ў паўторную перапрацоўку будзе вяртацца да 80—90% выкарыстанай упакоўкі. Дэпазітна-закладная сістэма паспяхова функцыянуе ў многіх еўрапейскіх краінах.
Цяпер чытаюць
Раман Пратасевіч асвоіў прафесію бармена і адшукаў працу. Вось у якім бары можна яго знайсці6
Каментары