03.01.2018 / 16:52

Дэпутаты ўхвалілі прапанову Случака штрафаваць за адказ па-руску на беларускамоўныя лісты 85

Гэта вынікае з ліста, што атрымаў юрыст Ігар Случак ад старшыні Пастаяннай камісіі Палаты прадстаўнікоў па правах чалавека, нацыянальных адносінах і СМІ Андрэя Наўмовіча.

Случак узняў гэтую тэму яшчэ ў ліпені 2017 года, калі стварыў анлайн-петыцыю за тое, каб была ўведзеная адміністрацыйная адказнасць за пісьмовы адказ не на мове звароту ў межах Закона «Аб зваротах грамадзян і юрыдычных асоб».

Ігар Случак.

Сёння сітуацыя выглядае так. У артыкуле 9.13 закона ўказваецца, што пісьмовыя адказы даюцца на мове звароту. Але ніякай адказнасці за парушэнне гэтай нормы не прадугледжана. То бок можна адказваць не на мове звароту абсалютна беспакарана. І ўжо былі падобныя прэцэдэнты.

Калі Случак спрабаваў прыцягнуць да адміністрацыйнай адказнасці за адказ па-руску на беларускамоўны зварот футбольны клуб «Смалявічы-СТІ», у яго нічога не атрымалася.

Як рэзюмавала кіраўнік справамі Смалявіцкага райвыканкама, штраф (ад 4 да 10 базавых велічынь) прадугледжаны толькі за канкрэтны пералік парушэнняў, такіх як адмова ад разгляду ці несвоечасовы адказ. А пра мову — ні слова.

З той жа прычыны і Кобрынскі райвыканкам адмовіў у прыцягненні да адміністрацыйнай адказнасці раённую арганізацыя абароны правоў спажыўцоў, якая паленавалася напісаць адказ па-беларуску.

Некалькі гадоў таму службоўцаў можна было прыцягваць да адказнасці па тым самым артыкуле 9.13. Напрыклад, пасля заявы Глеба Лабадзенкі быў аштрафаваны дырэктар ЖЭСа. Аднак пазней гэты артыкул канкрэтызавалі і распісалі, што менавіта з’яўляецца парушэннем. І сярод прыкладаў не аказалася «адказу не на мове звароту».

У кастрычніку 2017 года Ігар Случак даслаў электронны зварот Пастаяннай камісіі Палаты прадстаўнікоў, дзе звяртаў увагу на прабел у заканадаўстве і абгрунтоўваў, чаму яго трэба запоўніць. Днямі Ігар атрымаў адказ, у якім гаворыцца, што прапанова слушная і будзе ўлічаная.

«На думку Камісіі, Ваша прапанова наконт увядзення адміністрацыйнай адказнасці за «адказ на пісьмовы зварот не на мове звароту» заслугоўвае ўвагі і рэалізацыі. У сувязі з гэтым Камісія ў межах сваёй кампетэнцыі зробіць неабходныя крокі для ўліку Вашай ініцыятывы пры падрыхтоўцы комплексных прапаноў па ўдасканаленні заканадаўства аб зваротах грамадзян і юрыдычных асоб», — зазначаецца ў лісце.

nn.by

6
Илля / Адказаць
03.01.2018 / 17:05
а дэпутаты у двухкоссі па сэнсу ці мабыць не
6
Пячорны чалавек / Адказаць
03.01.2018 / 17:09
Як чыталі прапанову ў камісіі:
-------- ------ ----------------- ----------- ------------------------- --------------- ----- --------- ------------------ ------------------  ----------------------- -----------------   --------------------- ---------- --------------------- ------------------------- плаціць штраф ---------- ------------------- ------------- ----------------- ---------------- ----- ------------ ------- ------ ---------- ------------ ---------------- ---- ----------- --------- ---------------------- ---- ---- ---- -------------- -------------------- ------
Одобрено.
5
Азхари / Адказаць
03.01.2018 / 17:16
Смалявічы-СТІ То пэўна вушы прагрэсіўнага і вядомага бізнэсоўца Кныровіча тырчаць?
Паказаць усе каментары/ 85 /
Каб пакінуць каментар, калі ласка, актывуйце JavaScript у наладах свайго браўзеру