10.01.2018 / 14:01

У Беларусі ўпершыню ў гісторыі з'явіўся залацісты шакал ФОТА 37

Залацісты шакал папоўніў афіцыйны спіс сысуноў Беларусі, паведаміў карэспандэнту БелТА супрацоўнік навуковага аддзела нацыянальнага парку «Белавежская пушча» Вадзім Пракапчук.

Рэдкі для Беларусі від быў здабыты падчас палявання 9 снежня 2017 года ў ваколіцах вёскі Хабовічы Кобрынскага раёна.

Каб ідэнтыфікаваць невядомую жывёлу, інфармацыя і фатаграфіі былі размешчаны на паляўнічым інтэрнэт-форуме. Аператыўная сувязь дазволіла не згубіць найкаштоўнейшы асобнік — тушка і шкура жывёлы трапілі ў рукі навукоўцаў.

Узоры тканак былі заспіртаваны і адпраўленыя ў Мінск. Дэталёвы аналіз ДНК, праведзены спецыялістамі навукова-практычнага цэнтра Дзяржаўнага камітэта судовых экспертыз з выкарыстаннем міжнароднай базы дадзеных, пацвердзіў, што ўзоры тканак належаць даросламу самцу залацістага шакала.

«Такім чынам, гаворка ідзе пра новы, 82-і па ліку, від тэрыяфаўны Беларусі. Знакавым з'яўляецца менавіта тое, што гэта першы асобнік, для якога ёсць поўная навуковая атрыбутыка: этыкетка, чэрап, шкура, генетычныя ўзоры», — адзначыў Вадзім Пракапчук.

Залацісты шакал галоўным чынам насяляе паўднёвыя раёны Еўропы, Азію. У апошнія гады назіраецца пашырэнне арэалу яго пражывання з істотным прасоўваннем на поўнач. Так, звера ўжо неаднаразова адзначалі ў Польшчы, Літве, Латвіі. Ён аддае перавагу адкрытай прасторы — закінутыя меліярацыйныя сістэмы з мноствам каналаў, зараснікамі хмызнякоў, трыснягу.

9
Раман / Адказаць
10.01.2018 / 14:04
Трэба забараніць паляванне на яго, унесці ў Чырвоную Кнігу
8
Pich / Адказаць
10.01.2018 / 14:09
Шакалы прыходзяць на Беларусь ад паўднёвых суседзяў.
4
але ж / Адказаць
10.01.2018 / 14:14
хацеў быў з'явіцца той від, але яго тут жа, на падыходах, упалявалі
Паказаць усе каментары/ 37 /
Каб пакінуць каментар, калі ласка, актывуйце JavaScript у наладах свайго браўзеру