Учора ў Мінску была затрыманая група аўтамахляроў, якія з 2016 года інсцэнізавалі ДТЗ з удзелам дарагіх аўтамабіляў, застрахаваных на вялікія сумы з мэтаю атрымання страхавых выплат, паведамляе Міністэрства ўнутраных спраў.
KIA Quoris
Група з пяці чалавек ад 27 да 44 год валодала двума аўтамабілямі «KIA Quoris», застрахаванымі паводле сістэмы КАСКА. Трэцюю машыну гэтай жа маркі, але разбітую, ўдзельнікі купілі ў Расіі.
Фота — Следчы камітэт
Падмяняючы найбольш дарагія запчасткі са сваіх машын на дэталі з аварыйнай і імітуючы ДТЗ, ад ліпеня 2016 па кастрычнік 2017 група здолела атрымаць страхавых выплат на 118 тысяч рублёў. Усяго яны паўтарылі схему ажно пяць разоў.
Фота — Следчы камітэт
Затрыманым пагражае пакаранне паводле часткі 4 артыкула 209 КК РБ «Махлярства здзейсненае ў буйным памеры арганізаванай групай асоб» — ад трох да дзесяці год пазбаўлення волі.
