Калядным часам праграма «Вяскоўцы» тэлеканала «Белсат» завітала ў Гарадзенскую вобласць. Тут вядоўца Віктар Шукеловіч разам з жыхарамі невялічкай вёскі Вугляны з хлебам і соллю сустракаў маладога святара.
Для нешматлікіх насельнікаў Вуглянаў гэта сталася надзвычай важнай падзеяй, якую яны чакалі цягам доўгага часу з заміраннем сэрца.
Святар павіншаваў усіх вяскоўцаў са святамі ды шчыра распавёў Віктару Шукеловічу, як яму працуецца ў сельскай мясцовасці.
Віктар як сапраўдны каляднік затрымаўся ў гасцях ды разам з вяскоўцамі спяваў святочныя, народныя і патрыятычныя песні. Героі праграмы адкрыліся перад Віктарам і расказалі, чаму любяць родную зямлю і што для іх значыць Бацькаўшчына. Вядоўца звярнуў таксама ўвагу, што даўнейшыя спевы часам могуць дапамагчы ў жыцці, да прыкладу, падказаць, каго выбраць сабе ў пару, калі лёс ставіць чалавека перад складаным выбарам.
Праграма «Вяскоўцы» выходзіць на «Белсаце» штосераду а 18.25.
