На petitions.by 13 студзеня з'явілася петыцыя жыхароў сталічнага мікрараёну Каменная Горка, у якой яны заклікаюць усіх неабыякавых дапамагчы ў выратаванні апошняй дзіцячай горкі ад забудовы.
Дзеці і дарослыя на горцы.
Як сцвярджаюць аўтары петыцыі, гэта адзінае месца экалагічнага адпачынку ў раёне кальцавой дарогі. «Тысячы дзяцей штогод катаюцца там на санках і цюбінгах. Знос Горкі незаконны, бо не былі праведзеныя грамадскія слуханні — у парушэнне заканадаўства аб архітэктурнай і горадабудаўнічай дзейнасці. Гэта значыць, чыноўнікі перавысілі службовыя паўнамоцтвы. Пераважная большасць жыхароў — супраць. На гэтым месцы хочуць будаваць пажарнае дэпо. Мы не супраць дэпо, але перанясіце яго будаўніцтва на 100 метраў лявей. Месцы для забудовы вельмі шмат», — пішуць яны.
Трынаццатага студзеня тэхніка пачала разбурэнне ўскрайку горкі. На сённяшні вечар петыцыю падпісалі каля 400 чалавек.
Пачатак будаўнічых прац на горцы. Фота Павел Спірын