01.02.2018 / 10:45

Беларускі пашпарт — «аўсвайс», Лукашэнка — «гаўляйтар»: гомельскі блогер праводзіць у Мінску семінары пра тое, што ўсе мы — грамадзяне БССР 63

У поле зроку «Нашай Нівы» трапіў канал аднаго гомельскага блогера — Яўгена Пупырына: спачатку ён здымаў відэа з крытыкай Аляксандра Лукашэнкі, потым узяўся за Уладзіміра Пуціна. 

Але якія палітычныя погляды можа адстойваць чалавек, які раздае парады гледачам, як не служыць у войску, «легальна» не плаціць крэдыты, падаткі і ўнёскі у Фонд сацыяльнай абароны насельніцтва, як «засцерагчы дзяцей ад самаўпраўнасці дактароў Беларусі, якія робяць ім прышчэпкі»…? — за пашыраныя кансультацыі ён нават бярэ грошы. 

Пупырын, фота са старонкі УКантакце. Нарадзіўся ў Расіі ў 1992 годзе, стала жыве ў Гомелі. 

Як высветлілася, у Беларусі існуе цэлы рух актывістаў, якія лічаць сябе жыхарамі БССР. Свае сходкі яны праводзяць у Мінску, арандуючы залы і запрашаючы ўдзельнікаў праз інтэрнэт. 

І той Пупырын — рухавік «аднаўлення БССР». 

У інтэрнэце можна знайсці шмат відэа з канферэнцый у Мінску, дзе перад аўдыторыяй выступаюць адэпты БССР. Вось адна з іх.

Пра што там расказваюць? 

Першым выступае Пупырын са словам, што «ўсё пачнецца з нас, бо ў Беларусі трэба тры-чатыры гадзіны, каб з любога краю краіны прыехаць у сталіцу, а ў Расіі гэты працэс зацягнецца». 

Кіраўніка краіны пры гэтым называюць «гаўляйтарам», але пераказваць усю прамову Пупырына не мае сэнсу — у агульных рысах ён даводзіць, што «ўсіх падманваюць»: на яго думку, пасведчанне аб нараджэнні, выпісанае да 1991 года, ёсць аўтаматычным грамадзянствам СССР. Калі ж вы нарадзіліся пасля (як сам Пупырын), то пасведчанні аб нараджэнні бацькоў нібыта анулююць вашае беларускае грамадзянства. 

Далей мадэратар сустрэчы перадае слова свайму аднадумцу неахайнага выгляду — «таварышу Аляксандру Бобрыку». 

Бобрык прадстаўляецца «упаўнаважаным па правах чалавека БССР да навядзення на гэтай тэрыторыі канстытуцыйнага ладу» і падкрэслівае, што ён не хацеў прымаць гэтую пасаду, бо «і без яе мае ўладу», але, маўляў, давялося. 

Аляксандр Бобрык, «упаўнаважаны па правах чалавека БССР», дагэтуль працаваў у вадаканале. Скрыншот з іншага відэа

Бобрык адразу пачынае расказваць, што Рэспублікі Беларусь не існуе, дэманструе ён гэта на ўзоры свайго беларускага пашпарта. 

«Пашпарт Рэпублікі Беларусь — гэта аўсвайс [так называўся дакумент, які нацысты выдавалі на акупаных тэрыторыях за часамі Другой сусветнай вайны — «НН»], вы для іх [уладаў] — не людзі. Адкрываем старонку з фота, там пячатка памерам 30 міліметраў замест 40, а такія пячаткі ставяцца на пропускі ці пасведчанні. Значыць, гэта не пашпарт — яго можна выкінуць, а спецпропуск для перасоўвання па часова акупаванай тэрыторыі. Хто яго падпісваў? Я не здзіўлюся, калі гэта робіць прыбіральшчыца», — расказвае «таварыш Бобрык». 

Ён таксама апелюе да «рымскага права», згодна з якім запіс ініцыялаў у беларускім пашпарце азначае, што яго ўладальнік пазбаўлены ўсіх правоў.

Вішанька на торце бобрыкаўскіх разваг — парада, як засцерагчыся ад хваробаў.

«Як мы захворваем? Я патлумачу на сабе: я выходжу на вуліцу, а вірусаў там вельмі шмат. Глядзіце, да мяне падлятае вірус і пытаецца: «Ві — рус?». «Я — рус», адказваю. І ён далей пайшоў, мяне не чапае. А калі ты не рус — то прывітанне, дарагі! Гэта дзейнічае», — кажа ён.

Бобрык запэўнівае, што дзякуючы ягоным лістам з пасады знялі Марыяну Шчоткіну і Аляксандра Косінца. І тлумачыць, што Камітэтам дзяржаўнай бяспекі насамрэч кіруе сын Аляксандра Лукашэнкі. 

«Супраць нас вядзецца вайна, і мы як грамадзяне аплачваем гэта. Яны рыхтуюцца за нашыя грошы і вядуць вайну», — кажуць адэпты БССР. Яны раяць прысутным не прызнаваць сваё беларускае грамадзянства, а называць сябе грамадзянамі СССР: «як тады яны з вас штосьці спагоняць, калі вы не грамадзянін фірмы пад назвай Рэспубліка Беларусь?».

Пупырын пры гэтым расказвае гісторыю, як не плаціў крэдыт за тэлефон, а «таварыш Бобрык» — як пазбегнуў нейкіх працэдур у ваенкамаце. Пупырын дадае, што ўсе дакументы ў Беларусі — падробныя, а суддзі — нелегітымныя.

Гэтыя актывісты называюць «аднадумцам» экс-выкладчыка БДУ Андрэя Іванова, які адзначыўся тым, што нейкі час чытаў лекцыі беларускім ідэолагам пра масонскую пагрозу.

Чытайце таксама: «З 1991 года наша краіна акупаваная». У інтэрнэт трапіла шакуючае ВІДЭА семінара для беларускіх ідэолагаў

Застаецца незразумелым, чаму, напрыклад, каб арганізаваць у сталіцы сустрэчу з нацыянальна-арыентаваным гісторыкам, трэба прайсці пільны кантроль, а шарлатаны, якія адмаўляюць дзяржаўнасць краіны, у якой жывуць, робяць гэта лёгка. 

Арцём Гарбацэвіч

5
Игар / Адказаць
01.02.2018 / 10:54
Яшчэ адні імпералісты
110
NIK / Адказаць
01.02.2018 / 10:58
Ну и что? Людям нравится, люди развлекаются и даже зарабатывают. А Горбацевичу все неймется.
7
увы / Адказаць
01.02.2018 / 11:02
очередная воняющая российским фсб белорусофобная банда. при полном патронаже людей вакульчика.
Паказаць усе каментары/ 63 /
Каб пакінуць каментар, калі ласка, актывуйце JavaScript у наладах свайго браўзеру