03.10.2008 / 09:50

Асуджаныя маладафронтаўцы: чым займаюцца яны цяпер? даслана чытачом 26

Барыс Гарэцкі займаецца журналістыкай і працуе таксоўшчыкам. Зьміцер Хведарук паступіў у хрысьціянскі каледж. Аляксей Янушэўскі працуе ўэб-дызайнэрам. Артур Фінькевіч займаецца стварэньнем новай моладзевай арганізацыі «Моладзь за Беларусь». Піша Яўген Красноў.

На працягу двух год у дачыненьні да сяброў моладзевай арганізацыі было распачата больш за два дзясяткі крымінальных справаў. У выніку татальнага ўціску з боку спэцслужбаў 9 маладафронтаўцаў было асуджана па сумна вядомаму артыкулу Крымінальнага кодэксу 193 за дзейнасьць ад імя незарэгістраванай арганізацыі, а Зьміцер Дашкевіч і Артур Фінькевіч адбывалі тэрміны ў калёніях.

Чым цяпер займаюцца тыя маладафронтаўцы? Што робяць тыя, хто стаў чалавекам году-2007 у годзе 2008?

Барыс Гарэцкі зараз займаецца журналістыкай і працуе таксоўшчыкам.
Адзін зь нешматлікіх супрацоўнікаў радыё «Рацыя», які быў асуджаны за асьвятленьня мітынгу прадпрымальнікаў на 10 сутак арышту. Як маладафронтавец, Барыс разам зь Віктарам Янчурэвічам мае намер быць адным зь кіраўніком блёку «Маладая Беларусь» на выбарах у мясцовыя Саветы.
Зьміцер Хведарук сёлета паступіў у хрысьціянскі каледж,
прадэманставаўшы выдатнае веданьне Бібліі і пасьпяхова здаўшы іспыты. Напрыканцы лета, пасьля даволі вялікага перапынку, вярнуўся да актыўнай дзейнасьці ў межах арганізацыі. Ён мае шанцы стаць намесьнікам старшыні.
Наста Палажанка пасьля сканчэньня школы працягне адукацыю ў ЭГУ
на завочным аддзяленьні па спэцыяльнасьці «паліталёгія». Праўда, першую ўстановачную сэсію з дазволу рэктарату дзяўчына прапусьціла, бо тэрмін правядзеньня супаў з завяршальнай стадыяй выбарчай кампаніі — з 26 па 30 верасьня.
Зьміцер Дашкевіч спрабуе рэфармаваць Малады Фронт,
каб мець жыцьцяздольную арганізацыю напярэдадні прэзыдэнцкай кампаніі. Нядаўна, распачалася кампанія дыскрэдытацыі лідэраў арганізацыі, ствараюць уражаньне расколу ці развалу МФ. Зьміцер стаў першай і асноўнай мэтай правакацыі КДБ, аднак, тое ніяк не паўплывала на прагу актыўнай дзейнасьці. «Трэба страхнуць пыл і рушыць далей», — кажа Зьміцер.
Аляксей Янушэўскі, як і абяцаў, вярнуўся з Чэхіі,
дзе падчас крымінальнага перасьледу атрымаў палітычны прытулак. Цяпер узначальвае адукацыйны адзьдзел арганізацыі, займаецца ўэб-дызайнам, чым і зарабляе на жыцьцё. Праз паўтары году скончыць Віленскі пэдагагічны ўніверсітэт.
Іван Шыла пасьля выключэньня са школы выявіў жаданьне застацца ў Беларусі
і працягнуць навучаньне завочна. Негледзячы на безьліч прапановаў ад эўрапэйскіх адукацыйных установаў, ніводная зь іх не прадугледжвала прымальны для хлапца варыянт. Зараз Іван шукае працу і чакае траўня наступнага году, каб даздаць іспыт. Як маладафронтавец, каардынуе дабрачынную кампанію «Беларускую кнігу — дзецям».
Яраслаў Грышчэня у верасьні зьехаў у Польшчу
на навучаньне па праграме Кастуся Каліноўскага. Жыве ў горадзе Гнезна і атрымлівае спэцыяльнасьць журналіста, займаецца музыкай.
Наста Азарка працуе на льнозаводзе
і працягвае актыўна займацца грамадзкай дзейнасьцю. Упартасьць дзяўчыны выклікае зайздрасьць, а вершы — захапленьне.
Алег Корбан — рэдактар менскай газэты «Партызанская»,
сябар АГП і незалежнага прафсаюзу, якім і прасьвячае амаль увесь вольны час. Адышоў ад дзейнасьці Маладога Фронту.

Варта нагадаць пра маладафронтаўцаў, якія былі асуджаны пра «справе 14-ці».

Уладзімер Сяргееў працуе на трактарным заводзе. Арцём Дубскі жыве ў Асіповічах.
Дарэчы, у дачыненьні да хлапца спрабавалі ўвесну завесьці яшчэ адну крымінальную справу за махлярства. Тады маладзёна арыштавалі на трое сутак і бесьпасьпяхова вінавацілі ў тым, што ён падмануў тэлефоннага апэратара на некалькі мільёнаў рублёў.
А Артур Фінькевіч займаецца стварэньнем новай моладзевай арганізацыі «Моладзь за Беларусь»,
якая ўпершыню заявіла пра сваё існаваньне падчас акцыі 28 верасьня, запомніўшыся ўсталяваньнем намётаў і памаранчовага колера сьцягамі і стужкамі.

Яўген Красноў

0
Барыс Гарэцкі / Адказаць
03.10.2008 / 10:06
Класна! Натхняе! :-)
0
Кірыл Атаманчык / Адказаць
03.10.2008 / 10:55
- Кірыл Атаманчык)) абвінавачаны па артыкуле 193 ч.1 зараз знаходзіцца ў Вільні (Літва) і займаецца рэгісрацыяй Маладога Фронту ў Літве, а таксама з'яўляецца афіцыйным прадстаўніком МФ у Літве і кіраўніком маладзёвай ініцыятывы "StudAlliance".
0
алан / Адказаць
03.10.2008 / 11:33
"А Артур Фінькевіч займаецца стварэньнем новай моладзевай арганізацыі «Моладзь за Беларусь», якая ўпершыню заявіла пра сваё існаваньне падчас акцыі 28 верасьня, запомніўшыся ўсталяваньнем намётаў і памаранчовага колера сьцягамі і стужкамі." ---- Не атрымаецца! Артур хоча даказаць сабе і астатнім - што ён быццам бы лідэр, многае можа сам... Але щ Беларусі толькі дзве моладзевыя арганізацыі - Малады Фронт - і БРСМ. Другая, хутка лясне)
Паказаць усе каментары/ 26 /
Каб пакінуць каментар, калі ласка, актывуйце JavaScript у наладах свайго браўзеру