На ўездзе ў аграгарадок Межысеткі ў Магілёўскім раёне з'явіўся нядаўна новы храм у гонар Святога Уладзіміра. Гэта падарунак мясцовым жыхарам ад намесніка міністра замежных спраў Расіі Алега Сырамолатава, паведамляе sb.by.
З гэтай зямлёй звязана жыццё блізкіх расійскага чыноўніка, пра што сведчаць імёны на мемарыяльнай дошцы, што на сцяне побач з уваходам у царкву:
«Храм гэты збудаваны з дабрславення епіскапа Магілёўскага і Мсціслаўскага Сафронія спадзяваннімі і руплівасцю Сырамалотава Алега Уладзіміравіча ў памяці пра бацькоў, бабуль і дзядуль: Уладзіміра Кузьміча і Надзеі Мінаўны, Кузьмы Іванавіча і Сафіі Іванаўны, Міна Захаравіча і Варвары Ігнацьеўны».
Сам Алег Уладзіміравіч у месцах, адкуль яго родавыя карані, бываў толькі наездамі — прыязджаў у госці да дзеда. Але ў Межысетках яго ведаюць і ўдзячныя за добры ўчынак.
