21.02.2018 / 14:28

Кіраўнікі дыпмісій Вялікабрытаніі, Румыніі і Ізраіля прачыталі вершы беларускіх класікаў да Дня роднай мовы ВІДЭА 3

Кіраўнікі дыпмісій Вялікабрытаніі, Румыніі і Ізраіля ў Беларусі падтрымалі паэтычны флэшмоб і прачыталі вядомыя вершы беларускіх класікаў. Выбар дыпламатаў упаў на творы Якуба Коласа і Пімена Панчанкі, а прэзентацыя відэаролікаў адбылася ў Дзень роднай мовы. Раней да флэшмобу ў рамках праекта «Чытаем па-беларуску з velcom» далучыліся іх калегі з іншых замежных місій і таксама прачыталі беларускія творы.

Надзвычайны і паўнамоцны Пасол Румыніі, спадар Віярэл Машану, прачытаў верш Якуба Коласа «Надыход зiмы», які адлюстроўвае эмоцыі, уласцівыя для гэтай пары года.

Надзвычайны і Паўнамоцны Пасол Дзяржавы Ізраіль Алан Шогам абраў іншы твор Якуба Коласа — «Многа слаўненькiх куточкаў …». Дыпламат таксама перавёў паэтычныя радкі на родную мову. Так вершы беларускага класіка прагучалі і на іўрыце.

Спадарыня Фіёна Гіб, кіраўнік пасольства Злучанага Каралеўства Вялікабрытаніі і Паўночнай Ірландыі, прачытала верш Пімена Панчанкі «Мала сказаць: ненавiджу …».

На пачатку зімы вершы беларускіх аўтараў ужо прачыталі прадстаўнікі дыпмісій Швецыі, Славакіі, Чэхіі, Фінляндыі, Кыргызстана, Італіі, ЗША, Рэспублікі Карэя і Украіны.

Паэтычны флэшмоб праводзіцца ў падтрымку рэспубліканскага конкурсу юных чытальнікаў сярод вучняў 7 і 8 класаў «Чытаем па-беларуску з velcom». Удзельнікі конкурсу з усёй Беларусі даслалі на конкурс 2048 відэа з чытаннем твораў са школьнай праграмы па беларускай літаратуры. З лютага па красавік праходзяць рэгіянальныя фіналы конкурсу, на якіх пераможцы першага этапу выступаюць перад журы ўжывую. Рэспубліканскі фінал конкурсу адбудзецца ў траўні.

1
Памяркоўны / Адказаць
21.02.2018 / 16:09
А пасол Расіі пакуль не? Ці зусім не?
0
Алесь Беларус / Адказаць
21.02.2018 / 18:45
:)
0
Дзядьзька ў Вiльнi / Адказаць
21.02.2018 / 20:09
Ажно да слёз расхвалявала. Дзякуй паслам!
Каб пакінуць каментар, калі ласка, актывуйце JavaScript у наладах свайго браўзеру