24.02.2018 / 12:02

«Мы з вамі»: палякі едуць у Гайнаўку падтрымаць беларусаў і пратэставаць супраць маршу памяці Бурага ВІДЭА 40

Грамадзянскі рух «Грамадзяне RP» («Obywatele RP») заклікаў палякаў з'ехацца ў Гайнаўцы, каб пратэставаць супраць маршу памяці Бурага, які праводзяць польскія крайне нацыяналістычныя колы. 

«Грамадзяне RP» запісалі відэазварот на Ютубе, дзе, сярод іншага, гаворыцца: «Мы прыязджаем, каб паказаць, што вы [беларусы] не адны. І будзем прыязджаць столькі, колькі вам будзе пагражаць фашызм».

Адзін з актывістаў на відэа цытуе верш Ніла Гілевіча «Ты кажаш, я не ведаю вайны»: 

Я аднаго хачу, мая краіна:

Каб гэта скончылася ўсё на мне.

Каб гэта ўсё не стала доляй сына.

Марш памяці Бурага праводзяць правыя радыкалы. Яны называюць гэта «Маршам выклятых жаўнераў» («праклятых салдатаў»). Так у Польшчы метафарычна называюць антысавецкіх і антыкамуністычных партызанаў пасляваеннага часу. 

Рамуальд Райс па мянушцы «Буры» — гэта камандзір аднаго з такіх антыкамуністычных партызанскіх атрадаў. Атрад Бурага ў 1945—1948 здзяйсняў на Падляшшы таксама масавыя забойствы мясцовых праваслаўных. Такім чынам, польскія партызаны імкнуліся адстрашыць насельніцтва ад супрацы з камуністычнымі ўладамі і выклікаць эміграцыю беларусаў і ўкраінцаў з Падляшша ў СССР. Бандыты Бурага забівалі ўсіх, хто не мог згаварыць каталіцкай малітвы па-польску. Агулам загінула 79 чалавек.

Гайнаўка, гарадок каля Белавежскай пушчы, гэта адзін з цэнтраў кампактнага пражывання беларусаў у Польшчы.

Цікава, што Нацыянальны рух, які арганізоўвае шэсце ў Гайнаўцы, паводле некаторых звестак, фінансуецца з Масквы, як і шэраг іншых праварадыкальных рухаў Еўропы. Расследаванні «Нашай Нівы» выявілі, што расійскія грошы выкарыстоўваліся, у прыватнасці, для арганізацыі антыўкраінскіх акцый у Польшчы.

У той жа час Марш памяці Бурага асуджаюць як польскія ліберальныя, так і кансерватыўныя колы. У 2017 годзе прэзідэнт Польшчы Анджэй Дуда дэманстратыўна адмовіўся ўзяць патранаж над маршам памяці Бурага.

Сяргей Гезгала

3
Žvir / Адказаць
24.02.2018 / 12:24
Kranula. Vieļmi hlyboka kranula. Zusim niečakana. Dziakuj.  
71
ўантуфры / Адказаць
24.02.2018 / 12:38
Баяцца палякі, што гайнаўцы захочуць ад Польшчы адлучыцца. Ага, "маці-Польшча". Польскія нацыяналісты проста паказваюць, што у палякаў у галаве.
10
Васіль Астрэйка / Адказаць
24.02.2018 / 12:43
Дзякуй, браты-палякі.
Паказаць усе каментары/ 40 /
Каб пакінуць каментар, калі ласка, актывуйце JavaScript у наладах свайго браўзеру