08.03.2018 / 15:27

Што новага паказваюць аўтавытворцы на Жэнеўскім аўтасалоне? Шмат ФОТА 12

Па традыцыі, у сакавіку ў швейцарскай Жэневе аўтагіганты з усяго свету паказваюць новыя мадэлі сваіх машын, а таксама канцэпты, над якімі плануюць працаваць цягам бліжэйшых гадоў. 

У гэтым годзе на Жэнеўскім аўтасалоне прасочваецца тэндэнцыя да пераходу на гібрыдныя аўтамабілі: вытворцы не спяшаюцца цалкам пераходзіць на электрычныя рухавікі, як Tesla, але пры гэтым зніжаюць узровень шкодных выкідаў і расход паліва за кошт працы рухавіка ўнутранага згарання ў сімбіёзе з электрычным. Большасць аўтавытворцаў прэзентавалі хаця б адну гібрыдную версію.

Lexus 

Канцэпт Lexus UX упершыню быў паказаны яшчэ на аўтасалоне ў Парыжы. І вось, нарэшце ён стаў рэальнасцю: зараз гэта паўнавартасная серыйная мадэль. Новая платформа GA-C забяспечыла красоверу звышнізкі цэнтр цяжару, высокую цвёрдасць кузава і выдатную кіраванасць. У канструкцыі кузава шырока выкарыстаны алюміній: з яго зробленыя дзверы, крылы і капот.

Для пачатку вытворца прадставіў дзве мадыфікацыі. На Lexus UX 200 стаіць новы двухлітровы бензінавы рухавік Dynamic Force з высокай тэрмаэфектыўнасцю. Магутнасць рухавіка складае 171 к.с. Lexus UX 250h абсталяваны новай гібрыднай сістэмай чацвёртага пакалення. Разам з электраматорам магутнасць дасягае 178 к.с., фірмовы электрамеханічны варыятар удасканалены, але Toyota працягвае выкарыстоўваць нікель-метал-гідрыдны цягавы акумулятар замест сучаснага літый-іённага. Батарэя стала кампактней і размешчаная пад заднім сядзеннем.

Афіцыйнай інфармацыі пра старт продажаў і кошты на камплектацыі пакуль не паступала, але, па чутках, аўтамабіль сыдзе з канвеера толькі ў лютым наступнага года.

Toyota

Toyota паказала новы гібрыдны аўтамабіль Auris. Аўтамабіль пабудавалі на платформе TNGA, якая таксама забяспечвае больш нізкі цэнтр цяжару. Хэтчбэк стаў крыху даўжэйшы за прадстаўнікоў мінулага пакалення.

Аўтамабіль прапануюць з дзвюма гібрыднымі сілавымі ўстаноўкамі: 1,8-літровы атмасферны рухавік і электраматор (сумарнай магутнасцю 122 конскія сілы) і 2,0-літровым бензінавым маторам з электрарухавіком, якія выдюць 177 к.с.

Mercedes

Спорт-седан Mercedes-AMG GT топавай канфігурацыі абсталяваны чатырохлітровым бітурбавым рухавіком V8, які разам з электраматорам на задняй восі развівае магутнасць 805 к.с. Дзякуючы гэтаму аўтамабіль разганяецца да 100 км/г усяго за 3,1 секунды.

Канцэптуальны спорт-седан пазбаўлены бакавых люстэркаў. Замест іх — камеры.

Airbus, Italdesigh і Audi

Галоўная асаблівасць гэтага канцэпта, створанага сумесна кампаніямі Airbus, Italdesigh і Audi, крыецца ў здольнасці лятаць.

Усю прастору пад лабавым шклом займае сэнсарны дысплэй, які, відавочна, служыць для кіравання машынай і вываду актуальнае інфармацыі пра паездку/палёт. Тэрміны з'яўлення навінкі ў продажы і кошт не выдаюцца. Можна меркаваць, што такі футурыстычны канцэпт стане рэальнасцю яшчэ не хутка. 

Jaguar

Першы камерцыйны электракар брытанскага вытворцы Jaguar пазбаўлены рухавіка ўнутранага згарання, які замянілі батарэяй на 90 кВт. Дзякуючы ёй новы I-Pace здольны праехаць на адным зарадзе 480 км. Дамагчыся аналагічных паказчыкаў раней атрымлівалася толькі Tesla.

Дзякуючы 400 конскім сілам аўтамабіль разганяецца да 100 км/г усяго за 4,5 секунды. На відэа параўноўваецца Jaguar I-Pace з Tesla Model X дзвюх мадыфікацый. Jaguar перамог у абодвух выпадках.

Чытайце таксама: Renault прэзентавала амаль празрысты беспілотны электрамабіль ФОТА

Ілья Параскевіч

1
Туш / Адказаць
08.03.2018 / 15:40
Нешта выбарка абы якая. Чаму б не паказаць новыя мадэлі бюджэтных аўто, якіх там болей чым звычайна. Тыя мадэлі, якія прыедуць да нас і на які ездзіць 99% беларусаў. Там цяпер столькі цікавага і сапраўды інавацыйнага ў бюджэтным сегменце. А нам тут паказалі нейкія мэрсы па 200 тыс даляраў, лексусы і ягуары. 
12
Žvir / Адказаць
08.03.2018 / 15:47
Mers i Jahuar -  heta klas, a japoncy -  mima.
2
Ігар / Адказаць
08.03.2018 / 16:11
Жвір, гэта ты, як заўжды, mima са сваімі паўд..мі высновамі. А не японцы.
Паказаць усе каментары/ 12 /
Каб пакінуць каментар, калі ласка, актывуйце JavaScript у наладах свайго браўзеру