Здарэнне адбылося яшчэ ў пачатку лютага ў Вілейцы. У адзін са шматкватэрных дамоў зайшлі з бауламі тры смуглыя жанчыны 30—35 гадоў. Яны тэлефанавалі ва ўсе кватэры і прапаноўвалі гаспадарам купіць у іх пасцельныя рэчы.
«Аднак жыхары не спяшаліся пускаць жанчын у свае кватэры: многіх бянтэжыла неславянская знешнасць і смуглы колер твараў гандлярак, нават ярка рудыя валасы адной з іх зусім не ратавалі становішча. Мабыць, людзі атаясамлялі гандлярак з варажбіткамі, якія за «Пазалаці ручку» прапаноўваюць расказаць усю праўду», — паведамляе міліцыя Мінскай вобласці.
У рэшце рэшт, адзін з жыхароў, мужчына каля 80 гадоў, на прапанову купіць што-небудзь з пасцельных рэчаў, запрасіў жанчын у сваю кватэру. Азнаёміўшыся з асартыментам і выбраўшы ўпадабаныя яму коўдру і падушкі, мужчына згадзіўся набыць іх за 300 рублёў. Разам з жанчынамі ён прайшоў у спальню, дзе з кішэні паліто дастаў пачак 50-рублёвых купюр і паабяцаў, што яны змогуць зарабіць яшчэ больш, калі пагодзяцца задаволіць яго сэксуальныя фантазіі.
Нядоўга думаючы, адна з іх пагадзілася на прапанову і пацікавілася, дзе ў кавалера знаходзіцца ванны пакой. Жанчына паскардзілася, што не цячэ гарачая вада, пенсіянер паспрабаваў разабрацца.
Пакуль ён вырашаў праблемы з вадой, сяброўкі яго госці сышлі.
«Аднак калі на парозе спальні з'явілася яго выбранніца і не пабачыла сваіх сябровак, то яе энтузіязм імгненна вычарпаўся, і яна заявіла, што сам-насам з мужчынам у кватэры не застанецца. Хутка апрануўшыся, жанчына адправілася ўслед за сяброўкамі. Пенсіянер не моцна знерваваўся, так як і сам быў не асабліва ўпэўнены, што ў іх нешта атрымаецца. Праз некаторы час, западозрыўшы няладнае, мужчына кінуўся да шафы: 2000 рублёў у кішэні паліто — як не было», — распавядаюць міліцыянты.
У выніку пенсіянер набраў 102. Аператыўнікі крымінальнага вышуку апыталі пацярпелага і іншых жыхароў. Усе апытаныя сыходзіліся на думцы, што жанчынам 30—35 гадоў і яны вельмі падобныя на цыганак. Дзякуючы размешчаным непадалёк ад дома камерам відэаназірання ўдалося ўсталяваць, што гандляркі перасоўваліся на аўтамашыне серабрыстага колеру падобнай на «Пежо-806».
Цяпер іх шукаюць. Калі хтосьці пазнаў жанчын, просьба паведаміць у УУС Мінскага аблвыканкама па тэлефонах: 8 017 229 06 87 і 8 025 774 11 58.
