«Якасная дзелавая прэса — такі ж неабходны атрыбут бізнэс-інфраструктуры, як нармальнае заканадаўства, развіты рынак, банкі ці судовая сістэма. І чым якаснейшая прэса, тым на большы поспехі можа разлічваць нацыянальны бізнэс у працы ў сябе на радзіме і за мяжой. Мы ўпэўненыя, што менавіта «Бізнэс-рэвю» здольны стаць яшчэ адным эфектыўным інструментам для тых, хто займаецца бізнэсам, мае амбіцыі і волю для іх рэалізацыі», — адзначае старшыня рады дырэктараў Belkanton Group Вахтанг Ахвледыяні ў прадмове да першага пасля перапынку нумара часопіса.
Вахтанг Ахвледыяні, выдавец часопіса «Бізнэс-рэвю»
Выдавец падкрэслівае, што стрыжневая канцэпцыя застаецца нязменнай — «знаёміць сваіх чытачоў з тым, як людзі робяць бізнэс».
Часопіс перастане быць штомесячным і будзе выходзіць 6 разоў на год. «Бізнэс-рэвю» пазіцыянуецца як выданне для ўласнікаў і топ-менеджараў кампаній, прэтэндуючы на пакуль не занятую нішу «беларускага «Форбса». Плануецца, што ключавымі тэмамі часопіса стануць аналітычныя матэрыялы пра рынкі, паспяховыя бізнэс-кейсы і эксклюзіўныя інтэрв'ю з вядучымі бізнэсменамі краіны.
Героем першага нумара ў 2018 годзе стаў сузаснавальнік кампаніі Wargaming Іван Міхневіч, які пазней прадаў свой пакет акцый у кампаніі. Цяпер Іван Міхневіч займае 7-е месца ў рэйтынгу самых уплывовых беларускіх бізнэсменаў і валодае актывамі ў Беларусі, Швейцарыі і на Кіпры.
Часопіс «Бізнэс-рэвю» выдаецца з 2003 года. У 2009-м рэдакцыя прыпыняла выпуск выдання ў сувязі з фінансавымі праблемамі, якія ўзніклі на фоне крызісу. Пазней «Бізнэс-рэвю» атрымаў інвестыцыі ад Unica Group, міжнароднай кампаніі, якая выйшла на беларускі рынак у студзені 2014 года, а ў кастрычніку 2016 года работа часопіса была зноў прыпыненая.
У студзені 2018-га года выданне набыла Belkanton Group. Акрамя «Бізнэс-рэвю» ў выдавецкі пакет групы кампаній уваходзяць часопіс Office Life і дзелавы сайт officelife.media.
Belkanton Group з'яўляецца адным з лідараў беларускага рынку сэрвісу ў сегменце B2B. Група кампаній працуе ў сферы аптовых, карпаратыўных і рознічных продажаў канцылярскіх тавараў, офіснай тэхнікі, бытавой і прафесійнай хіміі, таксама з'яўляецца адным з лідараў на рынку сувенірнай прадукцыі. Працуе ў Беларусі, Расіі, Украіне, Літве.
