Праязджаў па Аршанскім раёне, кінулася ў вочы, што практычна ў кожнай вёсцы ёсць крамы, ярка ўпрыгожаныя зялёнымі шарыкамі і шыльдамі «Мы адчыніліся». Гэта на плошчах, якія належаць Аршанскаму райпо, вельмі шустра паадкрываліся «Еўраопты», піша ў «Нашу Ніву» чытач Андрэй.
З аднаго боку, для жыхароў малых населеных пунктаў суцэльная радасць — купіць усё «па акцыі» без наведвання горада.
З другога боку, узнікае пытанне: чаму геніяльныя райпоўскія кіраўнікі не змаглі забяспечыць у сваіх крамах сучасны ўзровень абслугоўвання, асартымент, канкурэнтныя цэны? Як так атрымалася, што кіруючы дзяржаўнай, па сутнасці нашай з вамі уласнасцю, давялі яе фактычна да банкруцтва? Хто ў гэтым вінаваты і што за гэта атрымаў?
І ўжо зусім нікому не цікавы лёс мясцовага рознічнага бізнэсу, які гэтая сетка проста забівае. Пакуль у парадку эксперыменту паглынанне мясцовага райпо адбываецца толькі ў Аршанскім раёне (напэўна, гэта і ёсць ўзняцце з руін і попелу), але гэтая сетка гатовая пракруціць падобную аперацыю па ўсёй краіне. І аднойчы ўвесь раздробны гандаль у краіне будзе належаць аднаму гаспадару, і будзе суцэльны «Еўраопт», пад якія б ягадкі або бонсцікі ён не маскаваўся пры дапамозе добрай магіі.
