10.05.2018 / 13:22

Лідары арганізацыі беларусаў Польшчы святкавалі 9 Мая з георгіеўскай стужкай, беларускія дыпламаты — без 42

Ян Сычэўскі

Кіраўнікі Беларускага грамадзка-культурнага таварыства ў Польшчы Ян Сычэўскі і ягоны намесьнік Васіль Сегень адзначылі Дзень Перамогі ў Беластоку з георгіеўскімі стужкамі. Беларускія дыпляматы адмовіліся іх начапіць, піша Радыё Свабода.

Урачыстасьці 9 траўня прайшлі на вайсковых могілках у Беластоку, дзе пахаваныя савецкія жаўнеры. Акцыю арганізавала беларускае консульства. Да яго далучыліся мясцовыя беларусы і прадстаўнікі Расейскага культурна-асьветнага аб’яднаньня.

На фатаздымках, якія апублікаваў у сваім Фэйсбуку журналіст Польскага Радыё Беласток Яраслаў Іванюк, бачныя Ян Сычэўскі і Васіль Сегень з георгіеўскімі стужкамі на пінжаках. Іх прынесьлі на могілкі сябры Расейскага культурна-асьветнага аб’яднаньня.

Васіль Сегень

Пасьля расейскай ваеннай агрэсіі ва Ўкраіне гэтыя колеры сталі сымбалем «рускага міру» і агрэсіўнай расейскай палітыкі стасоўна сваіх суседзяў. «Георгиевская ленточка» служыць вобразам адноўленай расейскай імпэрскай ідэнтычнасьці на постсавецкай прасторы.

У інтэрвію Яраславу Іванюку Васіль Сегень сказаў:

«Гэта толькі сымбаль. А які іншы сымбаль быў бы лепшы? Мне здаецца, што мы ўсходнія славяне, прынамсі я асабіста, адчуваю большую сувязь з гэтым рускім мірам, духоўным мірам, незалежна ад палітыкі. Гэтая сувязь адчуваецца на кожным кроку нават у сучаснасьці. Калі я еду ў Беларусь, перасякаю мяжу, то зусім іншае адчуваньне, чым у кантактах зь іншымі братамі-славянамі на Захадзе, у Польшчы, напрыклад», — сказаў Васіль Сегень.

Прысутныя на мерапрыемстве беларускія дыпляматы не захацелі чапляць стужкі ад арганізатараў.

Консул Беларусі ў Беластоку Ала Фёдарава ў інтэрвію Радыё Беласток заявіла: «Гэта ня нашая традыцыя. Не традыцыя Беларусі. У Беларусі ў нас іншыя стужкі, зь дзяржаўнымі сымбалямі».

Пракамэнтаваць выкарыстаньне георгіеўскіх стужак Свабода папрасіла Яна Сычэўскага, шматгадовага кіраўніка БГКТ. Ён вядомы сымпатыяй да Аляксандра Лукашэнкі, браў удзел ва Ўсебеларускім зьезьдзе. У 2001 у Менску выказаўся супраць інтэграцыі Польшчы ў Эўразьвяз і назваў Беларусь узорам дэмакратыі.

— Спадар Сычэўскі, гэтыя колеры сёньня сымбалізуюць агрэсіўную палітыку Расеі ва Ўкраіне, гэта сымбаль «рускага міру». Чаму вы згадзіліся надзець гэтыя стужкі?

— Цяжка мне гэта патлумачыць. Галоўным ініцыятарам сьвята было расейскае таварыства (арганізатарам было Генэральнае консульства Беларусі. — РС.). Гэты сымбаль мае глыбокую расейскую традыцыю. Ён сымбалізуе заканчэньне вайны.

— Але сёньня ён сымбаль вайны Расеі супраць Украіны.

— Гэтая стужка ня мае антыўкраінскай гісторыі. Для мяне яна мае іншае значэньне. Нас вызваліў СССР. Эўропа сама нас бы ня вызваліла. І чаму ўсё, што расейскае, кепска?

— А чаму вы не ўзялі з сабою стужку з колерамі дзяржаўнага сьцяга Беларусі, якая выкарыстоўваецца на Дзень Перамогі ў Менску?

— Мы не арганізатары мерапрыемства і ня можам дыктаваць сваіх правілаў.

— Але беларускія дыпляматы ня мелі георгіеўскіх стужак. Дык мо праз год вы зробіце на іхны ўзор?

— Навошта? Гэта сымбаль перамогі. У яго глыбокая традыцыя, нават царская яшчэ.

— Традыцыя, якая зьмянілася і сёньня стала сымбалем вайны ва Ўкраіне. Іх чапляюць на аўтаматы баевікі, якія забіваюць украінцаў, братоў-славян.

— Я нічога пра гэта ня ведаю і ня бачыў, каб гэтыя стужкі чаплялі баевікі.

***

Беларускае грамадзка-культурнае таварыства ў Польшчы — гэта найстарэйшая грамадзкая арганізацыя беларусаў у Польшчы, заснаваная ў 1956 годзе, праводзіць культурна-асьветную работу сярод беларускага насельніцтва Польшчы. Пры таварыстве працуюць бібліятэкі, клюбы, калектывы мастацкай самадзейнасьці. БГКТ ёсьць заснавальнікам тыднёвіка беларусаў Польшчы «Ніва».

3
ўантуфры / Адказаць
10.05.2018 / 13:32
"Расейскага культурна-асьветнага аб’яднаньня"
Дык гэтая кантора і у Польшчы ёсць. А пад яе шыльдай робяцца розныя справы.
5
nmh / Адказаць
10.05.2018 / 13:38
живут в польше, называют себя беларусами, поклоняются россии - когнитивный диссонанс 100%
4
Ліцьвін / Адказаць
10.05.2018 / 13:41
Гэта не беларусы!
Паказаць усе каментары/ 42 /
Каб пакінуць каментар, калі ласка, актывуйце JavaScript у наладах свайго браўзеру