У парламенце абмеркавалі новы «дэкрэт аб дармаедстве». Усе прысутныя дэпутаты прагаласавалі за, акрамя Ганны Канапацкай і Алены Анісім.
Дэкрэт аб садзейнічанні занятасці насельніцтва ў парламенце прадставіла міністр працы Ірына Касцевіч. Паводле яе слоў, у краіне «ўпершыню ўкаранёны комплексны падыход па маніторынгу сітуацыі на рынку працы», «дэкрэт накіраваны на фарміраванне ўмоў, пры якіх грамадзянін будзе сам зацікаўлены ў афіцыйным працаўладкаванні».
Міністр распавяла, што цяпер ідзе працэс «актуалізацыі складу камісій», якія будуць працаваць з базай працаздольных грамадзян, якія не занятыя ў эканоміцы, і разбіраць іх складаныя жыццёвыя сітуацыі.
— База будзе сфарміравана да 1 снежня 2018 года, у наступным будзе штоквартальна абнаўляцца, — распавяла міністр.
— Сёння ў краіне створана дзяржаўная служба занятасці, з якой прычыны па ўсёй краіне ствараецца чарговая надбудова ў выглядзе камісій? - спытала дэпутат Ганна Канапацкая.
Міністр патлумачыла, што ў камісію ўваходзяць прадстаўнікі розных службаў. Прадстаўнікі МУС дапамогуць у працы з асацыяльнымі непрацуючымі, падатковыя органы - са схаванай занятасцю. Палова тых, хто звярнуўся ў камісіі, была працаўладкаваная.
Пасля дэпутат заклікала калег не галасаваць за дэкрэт - «ён супярэчыць міжнародным нормам і прыніжае годнасць».
Дэпутат Алена Анісім удакладніла, ці патрэбна новая база, пры тым, што падобную сёння вядзе Рэгістр насельніцтва.
- Міністэрства працы працуе над стварэннем базы дадзеных. Аснова — база Міністэрства па падатках і зборах, ядро - Рэгістр насельніцтва, - патлумачыла міністр працы. - Мінпрацы - уласнік, аператар - цэнтр інфармацыйных тэхналогій Мінпрацы. Недзе да 15 жніўня мы будзем звяртацца да ўсіх дзяржорганаў зрабіць папярэднюю загрузку ў гэтую базу дадзеных. 15 лістапада мы будзем мець сфармаваную базу дадзеных, да якой 1 снежня будзе адкрыты доступ ва ўсіх выканкамах.