Сёння на летнюю тэрасу кафэ «Штолле» на праспекце ў раёне ЦУМа ўпаў пугач, якога заганялі вароны. Работнікі ўстановы выратавалі яго і распавялі Tut.by падрабязнасці.
Супрацоўніца кафэ Вікторыя распавядае, што ў раёне чатырох гадзін дня яны заўважылі, што над летняй тэрасай лятаюць вароны.
— Мы не разумеем, што адбываецца, і да нас з неба проста падае пугач. Мы яго бяром на рукі, заносім у рэстаран і бачым, што ён вырываецца. Мы выходзім з ім назад на летнюю тэрасу, і ён ляціць. Але за ім зноў паляцелі гэтыя вароны. Яны пакружылі хвілін пяць, і ён зноў прыляцеў да нас, але ўжо зваліўся абсалютна без сіл. Мы яго забралі і паклалі ў скрынку.
У пугача было пашкоджана крыло. Вікторыя патэлефанавала ў «Ахову птушак Бацькаўшчыны» і ў Дзяржінспекцыю аховы жывёльнага і расліннага свету пры прэзідэнце. У першай арганізацыі ёй параілі адвезці птушку ў лес, а ў другой — звярнуцца ў Мінскі заапарк. Дзяўчына звязалася з заапаркам і там ёй сказалі прывозіць ім птушку заўтра з 10 да 17 гадзін.
— Наш супрацоўнік забрала яго сабе, да іх прыехаў ветэрынар і сказаў, што ў пугача невялікі удар крыла. Літаральна праз пару дзён з ім усё будзе добра. Мы яшчэ раз патэлефанавалі ў заапарк і дамовіліся, што заўтра а 10 раніцы мы завязем яго туды.
