Дзясяткі тысяч дрэў і кустоў, высаджаных уздоўж трас увосені, загінулі
Увосені 2017 года Наталля Качанава на нарадзе ў Мінгарвыканкаме дала каманду заняцца «эстэтызацыяй гарадскога асяроддзя» сталіцы. У прыватнасці, чыноўніца запатрабавала, каб азелянілі Мінскую кальцавую аўтадарогу.
Сказалі — зрабілі. Ужо 9 лістапада мінскія дзяржаўныя СМІ рапартавалі, што ўздоўж МКАДа высадзілі 14,6 тысяч дрэваў і 95 тысяч кустарнікаў і пасадкі працягваюцца. Сапраўды, праца ішла нон-стоп да самых маразоў, пакуль не замёрзла зямля.
«Спецыялісты высаджвалі ўстойлівыя да антрапагенных нагрузак пароды дрэў, у прыватнасці, ясень. Што тычыцца кустоў, то, па назіраннях навукоўцаў, яны ў цэлым валодаюць добрай жыццеўстойлівасцю. Усё гэта дазваляе спадзявацца на тое, што наступнай вясной зялёнае ўбранне МКАДа будзе багацейшым і ярчэйшым», — пісалі «Мінск-Новості».
Нягледзячы на халады, на суботнікі павыганялі дэпутатаў і чыноўнікаў. У дождж яны ўкопвалі саджанцы на МКАДзе. Саджалі той жа ясень і шарападобныя вербы.
Аднак зімы саджанцы, асабліва хваёвыя, не перажылі. Так выглядаюць дрэвы ўздоўж МКАДа ў маі 2018 года.
Убранства сапраўды ўражвае. Вось толькі не так, як планавалася.
«Там саджалі той восенню ўсе і ўсё запар, бо зверху далі каманду», — расказаў «Нашай Ніве» суразмоўца, які працуе ў гадавальніку «Мінскзелянбуда».
Па словах работніка, калі закупляць у іх гадавальніку, то для «Мінскзелянбуда» існуе невялікая зніжка. Такім чынам, кошт аднаго саджанца ясеня выходзіць каля 13 рублёў. Саджанец шарападобнай вярбы — тыя ж 13. Адзін куст каштуе ў раёне 3 рублёў.
Такім чынам, можна падлічыць, колькі грошай у літаральным сэнсе выкінулі на дарогу.
Дакладная колькасць саджанцаў невядомая. Але саджанцы тых 15 тысяч дрэваў і 100 тысяч кустоў, якія былі высаджаныя толькі ў Мінску да 9 лістапада, каштавалі не менш за 495 тысяч рублёў адпаведна. Плюс расходы на аплату працы рабочых. Агульная ж колькасць пасаджаных дрэў была нашмат большая.
Чаму так сталася? Спецыялісты сказалі «Нашай Ніве», што прычыны маглі быць розныя. Па-першае, умовы надвор'я гэтай зімы не спрыялі ўкараненню: быў бясснежны перыяд з моцнымі маразамі. Па-другое, многія дрэвы кепска пераносяць уздзеянне солі, якой пасыпаюць дарогі і якая разлятаецца і расцякаецца на ўзбочыны. Але галоўнае, што, імаверна, была парушаная і тэхналогія пасадкі: кусты і дрэвы садзілі запозна і няправільна.
На фотах відаць, што многія дрэвы садзілі ў ямкі, абы-як выкапаныя экскаватарам, у гліну, без падсыпкі ўрадлівай глебы.
За высадку адказвалі зеленгасы адпаведных раёнаў, на тэрыторыі якіх знаходзяцца дадзеныя ўчасткі дарог.
Атрымаць каментар у «Мінскзелянбудзе» не атрымалася. Па словах сакратаркі, «цяпер гарачы час, усё начальства на пасадках».
Каментары