Чытайце таксама: Дзясяткі тысяч дрэў і кустоў, высаджаных уздоўж трас увосені, загінулі
Як высветлілася, у «Менскзелянбудзе» не згодныя з такімі высновамі. Кіраўнік службы па добраўпарадкаванні і ўтрыманні аб'ектаў гарадской гаспадаркі прадпрыемства Анжаліка Пузанкова кажа, што расліны ўздоўж кальцавой высаджваліся як у планавым рэжыме, так і ў сувязі з даручэннем Качанавай. А час пасадак, кажа яна, быў аптымальным.
— Спрыяльны перыяд для пасадкі заўсёды быў з 15 кастрычніка да 15 мая. Але ў сувязі з тым, што адбылося пацяпленне, ён паменшыўся. Таму казаць пра тое, што там парушаныя тэрміны пасадкі — вялікая памылка. Наадварот, калі дрэва знаходзіцца ў стане спакою, яно лепш прыжываецца.
Пытанні выклікала і тэхналогія пасадкі. Так, карыстальнікі звярнулі ўвагу на фота, дзе дрэва саджаюць з падрэзанымі каранямі. Анжаліка Пузанкова кажа, што гэта нармальная практыка.
Фота: «Мінск-Новості».
— У гадавальніку каранёвая сістэма спецыяльна падразаецца, бо за кошт гэтага ўтвораюцца дадатковыя карані, якія паглынаюць, і дрэва потым лепш сілкуецца. Каранёвую сістэму трэба фарміраваць, і яна павінна быць кампактнай.
Ды і ўвогуле ў стандартныя ямы саджалі стандартны матэрыял з гадавальніка, распавядае спецыяліст. А дзе быў дрэнны грунт — прывозілі новы. Высаджвалі дрэвы і кусты, устойлівыя да ўздзеяння антыгалалёдных соляў, якімі зімой пасыпаюць кальцавую. Гэта былі ясень, клён, вярба, шыпшына, спірэя японская і барбарыс. Пасадкі ажыццяўляліся ў адпаведнасці з распрацаваным Інстытутам добраўпарадкавання і гарадскога дызайну праектам, кажа Пузанкова.
— Быў таксама распрацаваны план мерапрыемстваў па павышэнні жыццяздольнасці гэтых раслін у вясновы перыяд. Для таго каб мінімізаваць наступствы ўздзеяння солі, восенню ў лункі заклалі плёнку і накрылі грунтам, каб рэагент не трапіў у зону каранёў. Увесну плёнку з грунтам выдалілі і на гэта месца завезлі новы грунт.
Акрамя таго, ствалы на зіму абгортваюць спанбондам. Увесну яго знялі, памылі ствалы і кроны, а затым сталі праводзіць палівы і падкормкі.
- Але чаму тады дрэвы і кусты выглядаюць мёртвымі?
Анжаліка Пузанкова тлумачыць, што дрэвы жывыя. Па-першае, той жа ясень — гэта дрэва, якое распускаецца позна. Па-другое, чакаць іншага ва ўмовах агрэсіўнага асяроддзя нават не варта было. Па-трэцяе, абследаванне паказала, што дрэвы жывыя.
— Зразумела, што няма дрэў і кустоў, якія будуць ва ўмовах солі добра расці. Верхнія галінкі на дрэвах могуць адмерці ад таго, што на іх трапляе солевая сумесь. Але са спячых пупышак утвараюцца новыя парасткі. Тая ж сітуацыя і з хмызнякамі, дзе стварэнне парасткаў ідзе ад кораня. Узнікаюць новыя парасткі, сухія галінкі абразаюцца, і рост аднаўляецца, што цяпер і адбываецца. Бачна, што кожны тыдзень з'яўляюцца новыя пупышкі. Яшчэ літаральна месяц — і ўсё будзе зялёнае.
Але пры гэтым Пузанкова не адмаўляе, што нейкія расліны маглі загінуць: у адпаведнасці з нормамі дапускаецца натуральны адпад да 10% высаджаных дрэў.
— Якія дрэвы не прыжыліся — трэба глядзець у чэрвені. Гэта мы ведаем па вопыту ўжо не аднаго года.
Пузанкова кажа, што пытанне яны вывучалі з Інстытутам эксперыментальнай батанікі: дрэвам неабходны час, каб аднавіцца пасля зімовага перыяду.
Што ж тычыцца фатаграфій, на якіх можна пабачыць загінулыя іглічныя, то тут справа ў тым, што іх высаджваў не «Мінскзелянбуд», а размешчаныя ўздоўж кальцавой прадпрыемствы, тлумачыць спецыяліст. Напрыклад, запраўкі. Пузанкова кажа, што яны не рэкамендавалі ім гэтага рабіць.
— Але многія дрэвы размешчаны далёка ад кальцавой. На іх таксама ўздзейнічае соль?
— Паводле даследавання, якое праводзілася некалькі гадоў таму з удзелам Акадэміі навук, чым большая хуткасць руху, тым далей разлёт солевых пароў. Машына едзе, утвараецца солевы туман, і гэты туман разлятаецца да 150 метраў, асядаючы на галінках.
