У ЗША 92-гадовая жанчына застрэліла ўласнага сына, каб той не адправіў яе ў дом састарэлых, паведамляе паліцыя.
Ане Мэй Блесінг прад'яўлена абвінавачанне ў наўмысным забойстве. Яна некалькі дзён абдумвала рашэнне свайго сына адправіць яе на апеку.
«Ты забраў маё жыццё, таму я забіраю тваё», — як паведамляецца, сказала яна, калі паліцыя выводзіла яе з дома ў Арызоне, у якім яна пражывала са сваім сынам і яго сяброўкай.
Блесінг паведаміла паліцыі, што пасля забойства мела намер скончыць жыццё самагубствам.
Забойства адбылося раніцай 2 ліпеня ў горадзе Фаунцін-Хілс.
72-гадовы сын Блесінг, імя якога не называецца, хацеў, каб яго маці пераехала ў дом састарэлых, бо з ёй стала цяжка жыць разам.
Як удакладняецца ў заяве мясцовай паліцыі, Блесінг схавала пісталет і рэвальвер у кішэнях свайго халата, пасля чаго зайшла ў яго спальню.
У ходзе сваркі яна выцягнула адзін з рэвальвераў, набыты яшчэ ў 1970-х гадах, і стрэліла ў сына.
Стрэліўшы ў сына, Блесінг навяла рэвальвер і на яго 57-гадовую сяброўку, якой удалося выхапіць зброю і адкінуць яе ў кут пакоя.
Тады Блесінг дастала іншы пісталет, які, як яна паведаміла паліцыі, ёй падарыў муж — таксама яшчэ ў 1970-х гадах.
Сяброўка выбіла і гэту зброю з яе рук, пасля чаго збегла і патэлефанавала ў паліцыю.
Жанчыне прад'яўленае абвінавачванне ў забойстве першай ступені, нападзе пры абцяжваючых абставінах і незаконным пазбаўленні волі. Заклад устаноўлены памерам 500 тысяч даляраў.
Каментары