Ахоўваецца дзяржавай?
Улады паклапаціліся -- абнесьлі разбураны палац плотам.
Былая веліч парасла быльлём.
У 1960-м Радзівілімонты сталі Чырвонай Зоркай.
Ніякія шыльды не ўратуюць панскі парк.
Помнік сядзібна-паркавай архітэктуры клясыцызму ў Радзівілімонтах (Клецкі раён, Меншчына, ад 1960 г. — Чырвоная Зорка), хоць і ўнесены ў Сьпіс архітэктурна-гістарычных помнікаў ды нібыта ахоўваецца дзяржавай, усё ж мае, як пісаў клясык, варты жалю выгляд.
Шыльда па дарозе да разбуранага палацу кажа, што тут месьціцца помнік прыроды рэспубліканскага значэньня «Радзівілімонты». І хоць пішацца на той шыльдзе пра адказнасьць за высяканьне паркавай расьліннасьці, гэта ўсё адно не ратуе адну з самых доўгіх у Беларусі ліпавых алеяў. Пра сам палац — ані слоўца. Ад яго, збудаванага італьянскім архітэктарам Спампані, мала што засталося — бязладнае нагрувашчаньне абломкаў сьценаў і перакрыцьцяў. І порцік з дубовых калёнаў. Усё гэта парасло быльлём. Але нельга сказаць, што дзяржава зусім не паклапацілася пра помнік 2-й катэгорыі — вакол палацу паставілі высокі плот. Ды гэта слаба дапамагае, бо мясцовыя як цягалі рэшткі палацу на дровы, так і цягаюць. Мабыць мела рацыю сіньёра Спампані, маці маладога архітэктара, калі адмовілася ехаць жыць «да дзікуноў».