«Няміга», «Неўрыда» і «Цмокі». Свежыя рэлізы беларускіх музыкаў: на што звярнуць увагу

2017 год быў сапраўды прарыўным для беларускай музыкі. З'явіліся і дасягнулі папулярнасці сучасныя хіп-хоп праекты, такія як Бакей, ЛСП. Выйшаў EP арт-рок гурта TonquiXod «Колер, якога няма». Гурт Navi выступіў з цудоўнай песняй «Гісторыя майго жыцця». Гурт Shuma паказаў усім, што такое беларускае фолк-тэхна. 2018 год у гэтым сэнсе пакуль што больш ціхі і рамантычны. Прапануем пазнаёміцца бліжэй з самымі свежымі рэлізамі першай паловы гэтага года.

З'явілася дзявочая каманда «Няміга».

Ксенія Валенда — лідарка, гітарыстка і спявачка, кажа пра гурт: «Няміга для нас — не проста прыгожая гістарычная назва, гэта алегорыя нашай мовы і культуры, якую мы ў сваіх песнях стараемся адрадзіць». «У сьвеце, дзе так шмат болю, агрэсіі, стрэсу — людзям не хапае душэўнага цяпла. Пасьля нашай музыкі некаторыя плачуць. І гэта якраз тое, дзеля чаго варта жыць». Гурт быў створаны ў мінулым годзе, Вера Алендра грае на флейце, Маша Лабовіч — на клавішах, Лізавета Лобан — на перкусіі. Дзяўчаты свой стыль вызначаюць як «акустык-фольк-рок».

https://youtu.be/N4vmYVL8I88

Скрыпачка гурту Vuraj Настасся Папова прэзентуе ўласны ЕР. «Plyvie Čoven» — гэта чатыры песні, дзе фолк сустракае электроніку з построкавым разуменнем вечнасці, піша 34mag.net.

Стваральніца праекта Настасся Папова пра рэліз:

— Назва Sneguole паходзіць ад літоўскага імя Snieguole, што можна перакласці як «пралеска». Мая мама хацела даць мне такое імя. Рэч у тым, што я нарадзілася ў Літве ў красавіку і ў той дзень пайшоў снег. Што праўда, маці перадумала.

Калі вы чакаеце ад рэліза фолку, які мы прывыклі чуць у выкананні гурту Vuraj, то папярэджваем: Sneguole — гэта сумесь жанраў, нават пры тым, што галоўны складнік — сапраўдны фальклорны матэрыял — застаецца на месцы.

https://soundcloud.com/34magnet/sneguole-pa-siarebranaj-rakie