05.08.2018 / 18:07

Пад Мінскам знайшлі магілу будаўніка Пішчалаўскага замка 10

11 жніўня (субота) а 13:00 у мястэчку Гарадзішча (6 кіламетраў ад кальцавой, за аўтарынкам «Малінаўка») адбудзецца перапахаванне Рудольфа Пішчалы — будаўніка Пішчалаўскага замка, колішняга прэзідэнта грамадзянскай палаты Мінскага суда, паведамляе Глеб Лабадзенка. Пішчалаўскі замак на сёння — найвялікшая паводле памераў гістарычная пабудова Мінска, помнік архітэктуры.

Пэўны час таму мой сябар, гісторык Эдвард Канановіч на аснове сведчанняў сталых жыхароў Гарадзішча зрабіў сенсацыйную знаходку — надмагільныя пліты Рудольфа і Сафіі Пішчалаў. Дагэтуль лічылася, што ніякай згадкі пра слаўны род Пішчалаў, якія валодалі Гарадзішчам больш за 300 год, не захавалася. Пліты ляжалі ў кучы смецця на глыбіні каля 1 метра. Тут жа трапляліся і чалавечыя парэшткі. У ліпені 2018 года на гэтым месцы прайшлі раскопкі пад кіраўніцтвам знаных археолагаў Сяргея Тарасава і Андрэя Вайцяховіча. На плошчы каля 25 м.кв. былі знойдзены парэшткі 14 чалавек. Цалкам ачышчаная ад смецця і даследаваная сямейная крыпта Пішчалаў.

Нельга сказаць, што Рудольф Пішчала — выбітная гістарычная асоба. Хутчэй гэта асоба, якая застанецца ў гісторыі такім вось цікавым чынам — пабудовай турмы, якая атрымала ў народзе ягонае імя. Аднак знаходка магілы Рудольфа Пішчалы — важная падзея для жыхароў Гарадзішча і аматараў гісторыі Менска.

Надмагільныя пліты былі пачышчаныя, літары абведзеныя (бо немагчыма было нічога прачытаць). Месца добраўпарадкаванае нашымі з Эдвардам сіламі, а поруч пастаўлены валун з гранітнай табліцай — аўтар Ігар Засімовіч.

На фота можна пабачыць пліты ў працэсе даставання з зямлі; працэс раскопак; цяперашні выгляд месца.

11 жніўня а 13:00 адбудзецца перапахаванне, цырымонію правядзе ксёндз Юры Санько. Адразу пасля заезду ў мястэчка ўзірайцеся ў левы бок — там на пагорку стаіць вялікі крыж, гэта і ёсць месца пахавання.

Дабрацца можна на аўто (6 км ад кальцавой, за аўтарынкам «Малінаўка»), маршруткаю www.marshrutka.lpy.by/e/3043-raspisanie-i-shema-marshruta, аўтобусам.

10
Туш / Адказаць
05.08.2018 / 20:25
Такая вялікая пашана для спонсара тыповай турмы Расійскай Імперыі, куды кінулі Каліноўскага і іншых патрыётаў Беларусі. Альбо я нешта прапусціў, альбо гэта Стакгольмскі сіндром.
9
Туш / Адказаць
05.08.2018 / 20:27
Такая вялікая пашана для спонсара тыповай турмы Расійскай Імперыі, куды кінулі Каліноўскага і іншых патрыётаў Беларусі. Альбо я нешта прапусціў, альбо гэта Стакгольмскі сіндром.
4
Юры з-пад Дворышча / Адказаць
05.08.2018 / 20:45
Ну хопіць ужо пісаць гэтую лухту пра "замак"! Ніякі гэта ня замак, а абсалютна тыповы архітэктурны праэкт турмы для расейскай імпэрыі, стаднартны і ідэнтычны такім жа турмам тых часін. Пішчала проста " выйграў тэндар" на яго пабудову. Стагодзьзямі нашым местам хапала для злачынцаў невялікіх гарадскіх астрогаў, а тут бац - і маскоўцам велічэзная вязьніца патрэбная. Маладзец, падрадчык Пішчала, пабудаваў - мо яшчэ і помнік яму паставіць?
Паказаць усе каментары/ 10 /
Каб пакінуць каментар, калі ласка, актывуйце JavaScript у наладах свайго браўзеру