Выдавецтва «Галіяфы» падрыхтавала спіс кніг з невялічкімі апавяданнямі, якія зручна чытаць у дарозе і якія не зоймуць шмат месца ў валізках.
«Сечка» Андрэя Федарэнкі
136 старонак цікавых і месцамі смешных гісторый пра мову, літаратуру і працу рэдактара. Гэтыя літаратурныя эсэ Андрэй Федарэнка пісаў на працягу дзесяці гадоў. «Мазаіка з перлаў», — так кажа пра кнігу крытык і літаратуразнаўца Марыя Верціхоўская.
«Ветровое стекло» Стаса Ільіна
Дзённік эмігранта з Беларусі, у якім Стас піша пра сваю працу дальнабойшчыкам. Кожны запіс — гэта захаваны фрагмент з жыцця на дарозе.
«Limbo» Андрэя Бондарава
Таксама невялікая і — што самае галоўнае — вясёлая кніга пра прыгоды мастака ў далёкай Індыі. Шмат фотаздымкаў, гумару і цікавых гісторый.
«Штрыхкоды» Франц Сіўко
Погляд аўтара на свет, на падзеі, на сябе. У сваіх эсэ Франц Сіўко закранае не толькі маральна-этычныя і сацыяльныя праблемы — мовы, адносін і жыцця ўвогуле, — але і смакавіта піша пра падарожжа.
«Мой цвік» Аляксея Палачанскага
Зборнік апавяданняў, які прынёс аўтару перамогу ў прэміі «Дэбют» у 2015 годзе. Кніга надзвычай асабістая — у ёй шмат мадыфікаваных жыццёвых сітуацый, у якія трапляў сам аўтар.
«Па-беларуску рэдка выходзяць кніжкі, якія пішуцца з такой смеласцю. Нарэшце кагосьці ў новай беларускай літаратуры немагчыма пераказаць. Тонкая кніжка пра тоўсты цвік», — так у 2014 годзе выказаўся пра кнігу пісьменнік Альгерд Бахарэвіч.
