УКантакце ёсць суполка «Гэта Мінск, дзетка». Там абмяркоўваюцца гарадскія чуткі, навіны, часам узнікаюць і каляпалітычныя абмеркаванні. Словам, звычайная група.
У каментарыях часам з'яўляўся нейкі Юрый Васілеўскі, які абражаў прыхільнікаў нацыянальнай сімволікі ды настальгіраваў па СССР.
У дзень смерці Аляксандра Кулінковіча гэты чалавек напісаў у суполцы, што «сантэхнік Кулінковіч выконваў творчасць дэбілаў, пра дэбілаў і для дэбілаў».
Гэта абурыла падпісантаў. Яны вылічылі асобу троля — ім аказаўся… выкладчык БДУ.
38-гадовы Васілеўскі працуе на факультэце радыёфізікі старшым выкладчыкам. У яго няма навуковай ступені.
У каментарах да выкрывальніцкага допісу інтэрнэт-супольнасць зацкавала выкладчыка.
А «Наша Ніва» дазванілася да Васілеўскага з просьбай патлумачыць, навошта ён абражаў людзей у сацыяльных сетках.
«Перад гэтай фразай быў напружаны дыялог. Калі цяпер сказаць спакойна, то творчасць гэтага гурта ніякай культурнай каштоўнасці не ўяўляе. Яна можа карыстацца попытам у людзей з вельмі нізкімі культурнымі запытамі, адпаведна — калі памірае чалавек, то гэта сумна, а што музыкальная творчасць спынілася…» — паспрабаваў патлумачыць выкладчык БДУ.
Мы спыталіся, чаму тады ён увогуле лічыць карэктным выказваць свае думкі ў такой форме.
«Я лічу карэктным выказаць сваё меркаванне пра творчасць гэтага гурта і пра тых, каму яна падабаецца», — абсёк ён.
Таксама Васілеўскі выказаў шкадаванне, што няма СССР, а яго аднаўленне было б магчымым і пажаданым, але «ў новым выглядзе, на новым падмурку, з абноўленымі ідэямі».
У каментарах ён расказваў, што ваяваў, але адмовіўся тлумачыць «Нашай Ніве», калі атрымаў кантузію.