13 жніўня Лукашэнка застаўся вельмі незадаволеным візітам на Аршанскі інструментальны завод. Стан прадпрыемства аказаўся даволі сумным. У выніку Лукашэнка адчытаў дырэктара завода і папярэдзіў міністра прамысловасці Віталя Воўка, што таго чакае праца ў Оршы.
У эфіры тэлеканала «Беларусь-1» прагучала фраза Аляксандра Лукашэнкі, накіраваная да міністра: «З заўтрашняга дня сюды [у Оршу — «НН»]. На якую пасаду, вызначым».
Прэс-служба Мінпрама не падыходзіць да тэлефонаў. Звязацца з Аршанскім райвыканкамам таксама немагчыма. Ніхто не падыходзіць нават да тэлефона «гарачай лініі».
На тым самым інструментальным заводзе таксама не маюць адказу на пытанне, ці хутка чакаць міністра і чым ён будзе займацца.
«Пакуль ніякай інфармацыі пра гэта няма», — паведаміла «Нашай Ніве» першая намесніца дырэктара завода Таццяна Драбышэўская. Яна прызнала, што калі б Воўку падрыхтавалі месца не на прадпрыемстве, а ў райвыканкаме, то на заводзе таксама б ужо ведалі пра гэта. Але пакуль ніхто нічога не чуў.
