У 2015 ён вылучаўся ў прэзідэнты Беларусі, а цяпер яго пасадзілі на дзевяць гадоў за наркату
Фатограф Аляксандр Юдаеў з Наваполацка трапіў у медыйную прастору ў 2015 годзе, калі паспрабаваў балатавацца ў прэзідэнты краіны. Юдаеў падаў у ЦВК ініцыятыўную групу ў складзе 107 чалавек, але ў дванаццаці з іх былі знойдзеныя памылкі ў біяграфіях і імёнах. У выніку ЦВК адмовіла яму ў рэгістрацыі.
Цяпер Юдаеў трапіў за краты па наркатычным артыкуле. Дзевяць гадоў ён правядзе ва ўстановах узмоцненага рэжыму.
Юдаеву 39 гадоў. Раней ён працаваў у наваполацкім Палацы мастацтваў, газеце «Веснік Нафтана». Аляксандр з няпростай сям’і.
Ягоны бацька Анатоль Юдаеў на працягу больш чым 20 гадоў быў намеснікам генеральнага дырэктара завода «Нафтан». «Маё вылучэнне ў прэзідэнты ён не ўспрымае ўсур’ёз», — казаў тады Юдаеў.
«Ёсць пэўныя містычна-гістарычныя падзеі, якія кажуць пра тое, што ўсё можа змяніцца. Ёсць прароцтва, што Аляксандр Лукашэнка быў блаславёным беларускімі духоўнымі асобамі на 21 год кіравання», — тлумачыў Юдаеў сваё вылучэнне.
Увогуле, Юдаеў схільны да пэўнага містыцызму. На сваёй старонцы Укантакце ён сябе называе наступным чынам: «Метапалітык, прадстаўнік дыпламатычнай місіі духоўнага аб'яднання метагалактыкі на планеце Зямля, па сумяшчальніцтве: крыэйтар, даследчык, назіральнік, аптымізатар, мультыспецыяліст, шматдзетны бацька, кандыдат у прэзідэнты Рэспублікі Беларусь».
У «перадвыбарчых» інтэрв’ю ён казаў, што гатовы даць Лукашэнку пасаду прэм’ер-міністра, а Крым прызнаць расійскім. Пры гэтым Юдаеў лічыў, што Беларусь і Расія павінны аб’ядноўвацца «духоўна».
Як паведамілі «Нашай Ніве» ў судзе Наваполацка, крымінальная справа супраць Аляксандра Юдаева паступіла да іх 5 сакавіка 2018 года.
16 мая ён быў прызнаны вінаватым па ч. 3 арт. 328 Крымінальнага кодэкса «Незаконны з мэтай збыту выраб, перапрацоўка, набыццё, захоўванне, перавозка або перасылка або незаконны збыт наркатычных сродкаў, псіхатропных рэчываў, здзейснены групай асобаў, альбо службовай асобай з выкарыстанне службовых паўнамоцтваў, альбо збыт наркатычных сродкаў ва ўстановах адукацыі, аховы здароўя, вайсковых частках, альбо загадзя непаўналетнім».
Суд прысудзіў Аляксандра Юдаева да 9 гадоў зняволення з канфіскацыяй маёмасці. Мужчына мусіць адбываць пакаранне ва ўстановах узмоцненага рэжыму.
Аляксандр Юдаеў — бацька чатырох дзяцей. Ягоная сям’я пакуль не каментуе тое, што адбылося. Са зняволення Юдаеў дасылае вершы.
Цяпер чытаюць
Ціханоўскі — беларусам: «Калі вы чакалі знак, то вось ён». Прайшла прэс-канферэнцыя з вызваленымі палітвязнямі45
Каментары