24.08.2018 / 18:06

Рэжысёр просіць падтрымаць «нагамі» фільм па Быкаву, які выходзіць у пракат на беларускай мове: «Каб усе пабачылі, што кіно па-беларуску запатрабаванае» 42

Рэжысёр Аляксандр Меліхавец пачаў здымаць «Народных мсціўцаў» паводле Васіля Быкава яшчэ ў 2010 годзе, але адсутнасць фінансавання «замарозіла» праект.

У 2016 годзе Аляксандр паспрабаваў сабраць на фільм грошы праз краўдфандынг, і зноў няўдача: на Талацэ не сабралі нават паловы з неабходных 6 тысяч даляраў.

Аднак цяпер стала вядома, што рэжысёр не закінуў гэтай справы: з дапамогай крэдыту, пазыкаў у сяброў і знаёмых ён змог дарабіць стужку. Нядаўна яе агучылі і цяпер плануюць прадставіць шырокай аўдыторыі ў кінатэатрах.

Цікава, што за гэтыя амаль 8 год у стужцы паўдзельнічалі тры склады акцёраў. У фінальнай 45-хвіліннай версіі граюць акцёры РТБД: Дзмітрый Давідовіч, Арцём Курэнь і Ілля Ясінскі.

У гэты момант рэжысёр завяршае апошнія дамоўленасці з мінскімі і іншымі кінатэатрамі: ён абяцае, што на наступным тыдні стане вядома, дзе і калі можна будзе пабачыць «Народных мсціўцаў».

«Я б хацеў, каб людзі падтрымалі гэты пракат нагамі, бо толькі так мы можам паказаць чыноўнікам, пракатчыкам і фільммэйкерам, што кіно па-беларуску запатрабаванае. Усе яны думаюць, што паказваць беларускамоўнае кіно нявыгадна камерцыйна, давайце дакажам, што гэта не так. Пакажам, што беларуская мова — гэта не абмежаванне, а магчымасць, не проста так жа яе ў якасці роднай падчас перапісу пазначае большая частка насельніцтва. Беларускамоўнага ігравога кіно не было ў вялікім кінапракаце 25 год. Задумайцеся над гэтай лічбай…. А між іншым, кіно — гэта асноўная і самая даступная забава для большасці нашых людзей. І гэта моцны інструмент пашырэння ўжывання беларускай мовы…», — заклікае Аляксандр і плануе, што яго кіно пабачыць мінімум 30 тысяч беларусаў.

Кацярына Карпіцкая

4
Мік-Цвік / Адказаць
24.08.2018 / 18:14
Правільныя словы- хто патрыётам сябе адчувае, абавязкова трэба падтрымаць! Падняць азадак і самаарганізавацца! Да таго ж, родных-блізкіх праінфармаваць!
4
Ytu / Адказаць
24.08.2018 / 18:16
Ідзём!
5
Петрыковец / Адказаць
24.08.2018 / 18:18
Падтрымаем i нагамi i рублём
Паказаць усе каментары/ 42 /
Каб пакінуць каментар, калі ласка, актывуйце JavaScript у наладах свайго браўзеру