У інтэрнэце працягваецца збор подпісаў за забарону на выкарыстанне ў Беларусі георгіеўскай стужкі. На дадзены момант на сайце petitions.by сабрана 589 подпісаў.
Арганізатары акцыі мяркуюць, што «у сувязі з падзеямі ва Украіне георгіеўская стужка стала сімвалам беззаконня, хаосу, нестабільнасці, а яе актыўнае выкарыстанне ўяўляе небяспеку для тэрытарыяльнай цэласнасці Рэспублікі Беларусь».
Арганізатары акцыі звярнуліся з сваёй прапановай да дэпутата Палаты прадстаўнікоў, гісторыка Ігара Марзалюка. Вось які адказ яны атрымалі:
«Увядзенне забароны на выкарыстанне георгіеўскай стужкі недарэчна з пункту гледжання, што такая забарона будзе выглядаць як плявок у твар нешматлікіх удзельнікаў вайны з фашыстамі, якія яшчэ жывыя сёння. І той факт, што георгіеўская стужка выкарыстоўваецца сёння пэўнымі дзялкамі ў палітычных мэтах не зменіць у цэлым пазітыўных адносінаў да яе, як да аднаго з сімвалаў Перамогі. Як у свой час не змяніў такога стаўлення факт выкарыстання стужкі ў якасці ўзнагароды ў частках уласаўскай РОА», — гаворыцца ў адказе Марзалюка.
