11.09.2018 / 12:08

Брэсцкія актывісты вырашылі праверыць адкіды завода — атрымалі крымінальную справу 10

Брэсцкія актывісты, якія непакояцца будаўніцтвам акумулятарнага завода, запрасілі з Масквы спецыяліста, каб узяць пробы глебы і хімічных адкідаў каля падобнага прадпрыемства ў Белаазёрску. Скончылася ўсё крымінальнай справай у Расіі.

Ілюстратыўнае фота

Падрабязнасці расказаў «Нашай Ніве» брэсцкі праваабаронца Раман Кісляк:

«У актывістаў была дамова з лабараторыяй «Тэстэка» Маскоўскага дзяржаўнага ўніверсітэта. Гэтая лабараторыя правярае глебу і ваду на цяжкія металы. Актывісты хацелі адправіць на праверку пробы з завода «БІТ-Сплаў», які знаходзіцца ў Белаазёрску».

«БІТ-Сплаў» працуе з 2013 года, прадпрыемства перапрацоўвае акумулятарныя батарэі. Актывісты зацікавіліся ім пасля пачатку будаўніцтва завода акамулятараў «АйПаўэр» у Брэсце.

Берасцейцы даўно і фактычна беспаспяхова змагаюцца з будоўляй «АйПаўэр». Жыхары не вераць, што вытворчасць будзе цалкам бяспечнай і настойваюць, што прадпрыемства варта перанесці далей ад горада. Збіраюцца подпісы, людзі выходзяць «на шпацыр» па плошчы перад выканкамам. Але будоўля ідзе, а мясцовыя ўлады і прадстаўнікі заводу запэўніваюць, што экалогіі і людзям нічога не пагражае.

Тое ж улады казалі і пра «БІТ-Сплаў», маўляў, небяспекі няма, усе паказчыкі ў норме.

І вось актывісты вырашылі праверыць бяспечнасць «БІТ-Сплава», бо, па словах Рамана Кісляка, прадпрымальнікі, з якімі белаазёрскі завод заключыў дамову на пераапрацоўку адкідаў, сваю працу не рабілі. Да таго ж, «БІТ-Сплаў» належыць той самай «Першай акамулятарнай кампаніі», якая і будуе ў Брэсце завод «АйПаўэр».

«Небяспечныя адкіды фактычна збіраліся каля пасёлка Зялёны Бор, а частку нават закапалі. Гэта свінцовы попел, гэта поліпрапілен.

Каб узяць пробы, прыехаў супрацоўнік лабараторыі з Масквы. Ён узяў пробы глебы і пробы тых адкідаў.

Бо пра хімічны склад адкідаў людзі таксама не ведаюць. Кажуць, там няма свінца, мыш’яка, а ўсё гэта там ёсць. Пасля прыйшлі вынікі, актывісты іх апублікавалі».

Дарэчы, паводле вынікаў пробаў, якія апублікавалі актывісты, колькасць свінца ў глебе паўсюль перавышае норму. За межамі санітарнай ахоўнай зоны, на адлегласці адзін кіламетр непасрэдна ад завода, пасля пяці гадоў працы прадпрыемства ўзровень утрымання свінца ў грунце перавышае дапушчальную канцэнтрацыю ў 6,8 раза. А на адлегласці паўтара кіламетраў ад завода — у 3,4 раза. За метр ад тэрыторыі, дзе захоўваюцца адкіды, колькасць свінца перавышае норму ў 14,6 раза.

Рэакцыя на гэта была. Вось толькі зусім не такая, як чакалася. Беларускія ўлады праігнаравалі вынікі пробаў.

Але ж не праігнаравалі іх у Расіі. Вядома, што супрацоўніка, які выязджаў браць пробы, выклікалі ў расійскі Следчы камітэт. Пакуль у якасці сведкі. Кажуць, што заведзена крымінальная справа па факце перамяшчэння небяспечных адкідаў.

У маскоўскай лабараторыі «Тэстэка», якая займалася аналізам, кажуць, што не даюць каментароў, бо гэта канфідэнцыйная інфармацыя. А з тым супрацоўнікам звязацца немагчыма, бо ён у адпачынку, запэўніваюць у «Тэстэка». 

УШ

0
Ганьба прагніўшаму палітбюро! / Адказаць
11.09.2018 / 12:17
Вангую развярку, у Белаазёрску закрыюць, а ў Брэсце кампенсуюць павелічэннем магутнасцяў. Яшчэ ў нагрузачку пару тысяч брацішак з усходу дашлюць.
0
яя / Адказаць
11.09.2018 / 12:18
Человек может состоятся, а может - нет. Вот когда читаешь новости про людей, которым не всё равно и которые рискуют, но делают - начинаешь верить, что еще не всё потеряно. Спасибо, вам, уважаемые. 

0
Юрась Беларус / Адказаць
11.09.2018 / 12:26
Ня ў той бок пайшлі за аналізамі. Хай бы зрабіла іх непрызнаная ў Беларусі якая-небудзь еўрапейская лабараторыя, але ад вынікаў аналізаў ды экспертыз ніхто б не адмовіўся, гэта ўзняло б грамадскасць за мяжой і станоўчага эфекту ад гэтага было б нашмат болей. А цяпер што? На маскоўскую лабараторыю наехалі, яна, хутчэй за ўсё, адмовіцца ад сваіх аналізаў увогуле, грамадскасць будзе дэзарыентаваная. Бо бяздоказна мала хто з людзей будзе падтрымліваць любое пачынанне. Нават такое відавочнае, як экалагічная катастрофа пад Брэстам з-за Брэсцкага акумулятарнага завода. Колькі ўжо разоў наступалі на граблі ў выглядзе мядзвежай паслугі "расейскага брата" - і ўсё адно працягваем на іх наступаць.
Паказаць усе каментары/ 10 /
Каб пакінуць каментар, калі ласка, актывуйце JavaScript у наладах свайго браўзеру