Былы топ-менеджар Беларусбанка, якому далі восем гадоў, але вызвалілі, знайшоў новую салідную працу 12

Фота прэс-службы Беларусбанка

Былы выканаўчы дырэктар Беларусбанка Анатоль Багавік працаўладкаваўся ў кампанію «БР-Кансалт», якая з'яўляецца даччынай структурай Банка развіцця, піша Tut.by.

Былы выканаўчы дырэктар Беларусбанка Анатоль Багавік, прысуджаны восенню 2017 года да 8 гадоў калоніі, вясной выйшаў на волю. Асноўны варыянт вызвалення — памілаванне прэзідэнтам.

Як распавёў адзін з суразмоўцаў партала ў фінансавым сектары, Багавік уладкаваўся на працу ў структуру, звязаную з Банкам развіцця. Гэта даччыная кампанія банка УП «БР-Кансалт». Там паведамілі, што Анатоль Багавік займае пасаду памочніка дырэктара. У прыёмнай сказалі, што цяпер Багавік знаходзіцца ў камандзіроўцы.

Як паведамляецца на сайце Банка развіцця, унітарнае прадпрыемства па аказанні паслуг «БР-Кансалт» створана ў канцы 2014 года. З 2016 года «БР-Кансалт» з'яўляецца кіруючай кампаніяй «Холдынгу арганізацый дрэваапрацоўчай прамысловасці». «БР-Кансалт» нададзеныя паўнамоцтвы па кіраванні дзевяццю прадпрыемствамі дрэваапрацоўкі, дзяржаўныя пакеты акцый і актывы якіх перададзены ва ўпраўленне Банку развіцця.

У сваім апошнім слове на судзе Анатоль Багавік казаў, што хацеў бы быць карысным сваімі прафесійнымі ведамі і досведам.