17.09.2018 / 06:29

Хочаш напісаць бестселер? Прыходзь да нас! 20

Школа маладога пісьменніка пры ГА «Саюз беларускіх пісьменнікаў» — адзіны ў Беларусі праект у фармаце creative writing school. Наша Школа не навучыць вас пісаць, але яна дакладна палепшыць якасць вашага пісьма, дасць навыкі напісання тэкстаў розных жанраў і павысіць літаратурную абазнанасць.

З 2012 года Школа праводзіць нефармальную адукацыю для дарослых. На практычных занятках з пастаяннымі выкладчыцамі, на лекцыях і майстар-класах найвядомейшых навукоўцаў і літаратараў маладыя, апантаныя літаратурай людзі вучацца чытаць і пісаць прозу, слухаць сябе ды аналізаваць творы калегаў. Мы не ставім асаблівых абмежаванняў па ўзросце: у нашай Школе могуць вучыцца людзі ад 18 гадоў да плюс бясконцасці, з усіх рэгіёнаў Беларусі!

У якасці прыемных бонусаў — прафесійнае рэдагаванне вашых тэкстаў, магчымасць апублікаваць свае творы ў літаратурных выданнях: часопісе «Дзеяслоў» і штомесячніку «Літаратурная Беларусь» (дадатку да газеты «Новы Час»), штогадовым калектыўным зборніку выпускнікоў Школы. Найлепшыя аўтары атрымаюць магчымасць выдаць уласную кнігу ў серыі СБП «Пункт адліку».

Навучанне ў школе — бясплатнае.

Як падаць заяўку ў Школу маладога пісьменніка?

Умовы паступлення:

* Заяўка на адрас shkola.pismennika@gmail.com

У заяўцы: 1) уласны празаічны мастацкі тэкст любога жанру на беларускай альбо рускай мове аб’ёмам 2-5 старонак; 2) матывацыйны ліст з адказам на пытанне, чаму вы хочаце вучыцца ў Школе пісьменніка; 3) спіс з 5-10 кніг, якія на вас паўплывалі найбольш.

Правілы афармлення заяўкі:

* Тэма ліста: Школа 2018-2019

* Вашыя прозу, матывацыйны ліст і спіс кніг дасылайце разам адным файлам у фармаце doc. На першай старонцы пазначце сваё імя і прозвішча, адрас пражывання, дату нараджэння, e-mail і кантактны нумар тэлефона.

* Файл назавіце лацінкай наступным чынам — «вашае прозвішча, ніжняе падкрэсліванне, вашае імя», напрыклад:

Pashkevich_Alaiza.doc

Bahdanovich_Maksim.doc

*Заяўкі для паступлення на курс 2018-2019 дасылайце на адрас shkola.pismennika@gmail.com да 21 верасня 2018 г.

Заяўкі не рэцэнзуюцца. Прыём паводле конкурсу. Пра вынікі прыёмнай кампаніі будзе паведамлена на пачатку кастрычніка на сайце lit-bel.org і ў паштовай рассылцы на адрасы, пададзеныя ў заяўках.

10
Милюхер / Адказаць
17.09.2018 / 07:25
хачу напісаць раман "Залёты", заснаваны на ўспамінах работніц Мінскага бюро падарожжаў   і экскурсій
8
Вікент Жымойтавіч Цвердазуб / Адказаць
17.09.2018 / 13:16
Добрая прадмова. Трэба будзе запісацца. Ужо накатаў на сборкік вершаў, можа што і надрукуюць, хто ведае. 
6
зольдат / Адказаць
17.09.2018 / 15:41
Вартая штука, такія есць у Еўропе даўно! Прыемна, што і ў нас пачалося. Толькі пішуць, што з 2012 дзейнічае, а ніколі не чуваць было...
Паказаць усе каментары/ 20 /
Каб пакінуць каментар, калі ласка, актывуйце JavaScript у наладах свайго браўзеру