Станіслаў Шушкевіч: Я перанёс інфаркт на нагах, а ў лечкамісіі гэта не заўважылі
І пасля шасці дзён інтэнсіўнай тэрапіі ў РНПЦ «Кардыялогія» паляцеў у Карэю.
Былы кіраўнік Беларусі Станіслаў Шушкевіч у інтэрв'ю «Народнай волі» распавёў, што перанёс інфаркт на нагах.
«І тыя медыкі, у якіх я назіраўся ў лечкамісіі, яго не заўважылі. Але мне пашанцавала — я трапіў да добрых дактароў у кардыялагічны цэнтр. І яны мяне інтэнсіўна лячылі. Адна кропельніца доўжылася сем з паловай гадзін. Уяўляеце, што гэта такое? Я прыняў шэсць такіх…».
«Калі я прыехаў у РНПЦ «Кардыялогія» на кансультацыю, і доктар зірнуў на маю кардыяграму, ён адразу спытаў: калі вы перанеслі інфаркт? І гэта было сказана так, што я зрабіў выснову, што любы дурань, які паглядзіць маю кардыяграму, убачыў бы там інфаркт. Але высветлілася, што дактары новага шыкоўнага дзяржаўнага медыцынскага цэнтра, дзе я абслугоўваюся, яго не заўважылі…»
Станіслаў Шушкевіч кажа, што гэтыя кропельніцы былі горшыя, чым пералёт з Масквы ў Сеўл, які доўжыўся восем гадзін. У РНПЦ «Кардыялогіі» яго паставілі на ногі за шэсць сутак.
У Карэю ён паляцеў пасля выхаду з бальніцы. Туды лётае штогод на працягу 26 гадоў на канферэнцыю па аб'яднанні Карэі. Сёлета там было шмат былых прэзідэнтаў, прэм'ер-міністраў і старшынь Вярхоўных судоў краін Еўропы і былога СНД. Станіслаў Шушкевіч дадае, што адмовіўся ад іншых лекцый у замежных ВНУ, бо не дазваляе здароўе.
На пытанне пра тое, як на інфаркт адрэагавала яго жонка, Станіслаў Станіслававіч сказаў, што яна кандыдат фізіка-матэматычных навук, але апошнім часам ужо і ў медыцыне стала някепска разбірацца. «Кантралюе мяне больш жорстка, чым самы строгі доктар! І прымушае мяне вельмі многае выконваць. І я не супраціўляюся…» — пажартаваў Станіслаў Шушкевіч.
«Калаўра мы не пакрыўдзілі»: стала вядома пра новае месца працы былога старшыні Нацбанка3
Каментары