Ужо болей як сто год адзіным варыянтам лячэння апендыцыту лічылася выдаленне запалёнага органа. І толькі цяпер хірургі высветлілі, што аперацыя зусім не абавязковая — у большасці выпадкаў пацыенту досыць прапісаць курс антыбіётыкаў.
З сенсацыйнай заявай выступілі навукоўцы з Універсітэта Турку. Раней праведзеныя даследаванні ўжо асцярожна паказвалі на магчымасць лячэння апендыцыту антыбіётыкамі, аднак да цяперашняга часу такіх рэкамендацый стараліся пазбягаць. Дактары не маглі выключыць той варыянт, што антыбіётыкі толькі здымаюць вострую форму запалення — і аперацыя ўсё ж спатрэбіцца пазней, толькі будзе ўжо складанейшай.
У ходзе маштабнага эксперыменту фінскія навукоўцы на працягу пяці гадоў назіралі за трыма сотнямі пацыентаў ва ўзросце ад 18 да 60 гадоў, якім было прапанавана вылечыць нічым не ўскладнены апендыцыт без хірургічнага ўмяшання, антыбіётыкамі.
На працягу трох дзён лекі ім ставілі ў бальніцы, унутрывенна, а затым яшчэ тыдзень яны прымалі антыбіётыкі дома, у выглядзе таблетак.
У выніку амаль дзве траціны пацыентаў выдатна абышліся без аперацыі. А ў тых, каму яна ўсё-такі спатрэбілася, выдаленне апендыкса прайшло без усялякіх ускладненняў.
А значыць, не ўскладнены востры апендыцыт трэба перш за ўсё спрабаваць лячыць менавіта антыбіётыкамі, робяць выснову аўтары даследавання. Гэта ніяк не пагоршыць стан пацыента, затое з вялікай доляй імавернасці можа выратаваць яго ад непатрэбнай аперацыі і спадарожных рызык траплення ў рану інфекцый.
