Тыдзень таму 30-гадовага мужчыну затрымалі ў мінскім аэрапорце. Падрабязнасці прыводзіць партал tut.by.
Нядаўна дзяржсакратар Рады бяспекі Станіслаў Зась паведаміў, што ў Беларусі затрыманы замежнік, які знаходзіўся ў міжнародным вышуку «за дачыненне да тэрарыстычных дзеянняў, забойства ў тым ліку».
Аказалася, гаворка ідзе пра 30-гадовага расіяніна. 4 кастрычніка яго затрымалі ў аэрапорце ў Мінску, распавёў прадстаўнік Генпракуратуры Дзмітрый Брылёў. Вядома, што ордар на арышт мужчыны выдаў пракурор акруговага суда горада Грац (Аўстрыя).
«Па папярэдніх дадзеных, мужчыне інкрымінуюць забойства, злачынствы, звязаныя з тэрарызмам, прычыненне цяжкіх цялесных пашкоджанняў і ўдзел у злачыннай арганізацыі — размова аб «Ісламскай дзяржаве», - распавёў Дзмітрый Брылёў.
Паводле пастановы намесніка мінскага транспартнага пракурора затрыманы змешчаны пад варту з мэтай выдачы. Мужчына знаходзіцца ў СІЗА № 1 у Мінску. Па правілах на працягу 40 сутак аўстрыйскі бок мусіць падрыхтаваць пакет пацвярджальных дакументаў, на падставе якіх будзе прымацца далейшае рашэнне.
