Пасол Украіны спадзяецца, што ўкраінскі канал у кабельных сетках з'явіцца да канца года
У снежні ў кабельнай сетцы вяшчання Беларусі з’явіцца ўкраінскі канал, спадзяецца пасол Украіны ў Беларусі Ігар Кізім. Пра гэта ён сказаў на адкрыцці новага сезону курсаў украінскай мовы ў Мінску.
«Ёсць вялікая праблема: мы ніяк не можам запусціць украінскі тэлевізійны канал. Год, нават больш б’юся над гэтым. Гэта канал UATV, ён будзе на трох мовах: па-ўкраінску, па-руску і па-англійску, як «Беларусь-24». Гэтае пытанне будзе падымацца і на сустрэчы прэзідэнтаў на наступным тыдні. Спадзяюся, ужо ў снежні гэты канал будзе».
Расказваючы пра свае намаганні па адкрыцці канала, пасол заўважыў: «Я ўвесь час вучу беларускую мову, увесь час чытаю па-беларуску, але няпроста вывучыць мову, якую і так добра разумееш. Калі мы пачынаем з вашым міністрам інфармацыі Карлюкевічам спрачацца, мы пераходзім на ўкраінска-беларускі суржык, абы было паразуменне».
Канал tv.ua быў заснаваны ў 2015 годзе. Вядзе вяшчанне на пяці мовах: украінскай, рускай, англійскай, арабскай, крымскататарскай. Акрамя навін, канал здымае ўласныя праграмы пра падзеі ва Украіне, правядзенне эканамічных рэформ, дасягненні ў навуцы і культуры, знакамітых украінцаў, гісторыю, прыроду і турыстычныя маршруты.
Цяпер чытаюць
Бедны, расчараваны — асабліва ў родных — і нікому непатрэбны. Злы дзённік Барадуліна дазваляе зазірнуць унутр генія2
Каментары