Чарговая перадача «Наша жыццё» на тэлеканале АНТ была прысвечаная войску. Ад незалежнага грамадства ў перадачу была запрошаная кіраўнічка «Гавары праўду» Таццяна Караткевіч. Быў таксама вайсковы эксперт Леанід Спаткай, які быў на выбарах 2015 года даверанай асобой Таццяны Караткевіч.
Лідарка «Гавары праўду» Таццяна Караткевіч. Скрын з сайта ont.by.
«Армія павінна стаць адкрытай для грамадзянскай супольнасці, каб разумець, якія пазітыўныя перамены адбыліся і якія ёсць памылкі. Статут не павінен быць такім закрытым. У салдата павінен быць доступ да тэлефона, калі ён хоча пазваніць і калі няма нічога тэрміновага, то ўсе выхадныя ён павінен праводзіць з сям’ёй, як гэта зроблена ў Еўропе», — адзначала Караткевіч.
«Не ведаю, ці перамаглі б у Другой сусветнай, каб быў такі статут», — адсмяяўся на гэта вядучы Дзмітрый Бачкоў.
«Каб салдат не губляў сувязь з грамадствам, каб ён не ўспрымаў сябе, як у турме», — працягвала Таццяна Караткевіч.
«Армія — гэта паўсядзённая цяжкая праца, да якой чалавек павінен быць прывучаны. У войску чалавек дысцыплінуецца. Калі пачнецца вайна, то ваш сын, які не служыў, не зможа канкрэтна вас абараніць. Ён паслужыць у альтэрнатыўнай службе і пабяжыць у альтэрнатыўныя кусты», — стаў прыводзіць прыклад палітолаг, выкладчык БНТУ Аляксей Бяляеў.
«Я сама сябе магу абараніць», — адрэзала Караткевіч. Гэта выклікала толькі смех Бяляева.
Дэпутат Палаты прадстаўнікоў Дзмітрый Шаўцоў. Скрын з сайта ont.by.
«Я б спыніў усе лібералізацыі. Армія створаная для таго, каб чалавек у ваенны час узяў зброю і пайшоў абараняць радзіму. А як ён будзе ваяваць, калі ён на суботу-нядзелю будзе бегаць да мамкі па піражкі? Яму камандзір будзе не загадваць, а ўгаворваць, каб нешта зрабіў. Мужчына выхоўваецца нястачамі», — адказаў Караткевіч дэпутат Палаты прадстаўнікоў Дзмітрый Шаўцоў.
